අපේ සූර්යයාගේ දැවැන්ත කුහරයක් අභ්‍යවකාශ යානයකින් සොයා ගනියි!

සූර්යයාගේ කාලක් පමණ ඇතුළු වන සේ සෑදුණු යෝධ කුහරය තුළින් සූර්යය ජාලා පිටතට විදිනවා. මෙම කුහරය ඇති වී තිබෙන්නේ හිරුගේ බාහිර කලාපයේ අඩු ඝනත්වයෙන් යුත් ස්තරයේ කොටසකයි.

මේ කුහරය එළිදරවු කර ගෙන ඇත්තේ සූර්යයා ආවේක්ෂණය සඳහා යවා ඇති සුවිශේෂ නිරීක්ෂණ යානයකිනි. යුරෝපීය අභ්‍යවකාශ ඒජන්සිය හා නාසා ආයතනය එක්ව යවා ඇති සූර්ය හා සූර්යගෝලීය නිරීක්ෂණාගාරය (Solar and Heliospheric Observatory) මගිනුයි, මේ නිරීක්ෂණය කර ඇත්තේ. පසුගිය ජූලි 13ත් 18ත් අතර කාලය තුළදියි, ඒ නිරීක්ෂණය සිදු වූයේ.

 
සූර්යයාගේ උත්තර ධ්රුවයට බර වෙන්නට පිහිටි දැවැන්ත සිදුර අභ්‍යවකාශ දුරේක්ෂයකින් ඡායාරූප ගත කර තිබූ අයුරු. කළු පැල්ලමෙන් පෙනෙන්නේ ඒ සිදුරයි.

මෙම සිදුර සියලූ සූර්ය කි‍්‍රයාකාරකම්වලින් ශූන්‍ය තැනක් සේ පෙනුනත් ඒ තුළින් ඉතා දරුණු ලෙස සූර්ය සුළං නිකුත් වෙනවා. තත්පරයකට සැතැපුම් 500ක වේගයෙන් සූර්ය අංශූ පිටතට විදිනවා.

මේ සූර්ය සිදුරෙහි ඇති උෂ්ණත්වය සූර්යයා මතුපිට අනෙක් තැන්වලට වඩා උෂ්ණත්වය අඩු නිසා අපට අඳුරු ස්වරූපයකින් පෙනෙනවා.

නාසා ආයතනයේ ගොඩාඞ් අභ්‍යවකාශ පියාසර මධ්‍යස්ථානයේ කැරන් ෆොක්ස් කියන්නේ මෙසේ සූර්ය සිදුරු ඇති වී සාමාන්‍ය සංසිද්ධියක් බවයි. විවිධ කාලවල එක් එක් තැන්වල මෙසේ සිදුරු වන බවත් මෙය වසර 11ක් පුරා සිදු වන සූර්ය කි‍්‍රයාකාරිත්වයක් ලෙස ඔහු හඳුන්වයි.

 
විද්‍යාඥයන් මේ සූර්ය සිදුරු අධ්‍යයනය කරන්නේ වැඩිපුර ම අභ්‍යවකාශ කාලගුණය පිළිබඳ හදාරන්නටයි.

සූර්ය කි‍්‍රයාකාරී චක‍්‍රය මේ වන විට උච්චස්ථානයට පත් වෙමින් පවතිනවා. එය මේ වසර අවසන් වන තෙක් පවතී යැයි විශ්වාස කරනවා. 2013 අවසන් වන විට මේ සූර්ය සිදුරු ඇති වීම අඩු වනු ඇති.

සූර්ය කි‍්‍රයාකාරී චක‍්‍රය උච්ච මට්ටමකට පත් වන විට සූර්යයාගේ චුම්බක ක්ෂේත‍්‍රය නොපිටට පෙරළනවා. ඒ නිසා ධ්රුව ආශි‍්‍රතව ඇති වන සූර්ය සිදුරුවල චුම්බක ආකර්ෂණ ප‍්‍රති විරුද්ධ අතට විහිදෙනවා.

මේ සූර්ය සිදුරු ප‍්‍රමාණයෙන් හා ගණනින් විශාල වෙමින් ධ්රුවවලින් ඈත් වෙන්න පටන් ගන්නවා සූර්ය කි‍්‍රයාකාරී චක‍්‍රය අව පක්ෂයට යද්දී.

මේ ඇති වී තිබෙන සිදුර සැතැපුම් 400,000ක් පළල එකක්. ඒ කියන්නෙ පෘථිවි 50 එක පෙළට තිබ්බා තරම් ප‍්‍රමාණයක්. මීට වඩා විශාල සිදුරු ඇති වූ අවස්ථා වාර්තා වී තියෙනවා.

මෙවැනි සිදුරු ඇති වීමට තුඩු දෙන හේතුව තවමත් පැහැදිලිව සොයා ගෙන නැහැ. සූර්යයාගේ චුම්බක ක්ෂේත‍්‍රයේ වෙනස්කම් ඇති වන, විශේෂයෙන්ම ඉහළ යන විට අනිත් තැන්වල මෙන් ඒවා ඉක්මනින් පහළ නොවැටීම නිසා මෙවන් තත්වයක් ඇති වෙනවා විය හැකියි.

විද්‍යාඥයන් මේ සූර්ය සිදුරු අධ්‍යයනය කරන්නේ වැඩිපුර ම අභ්‍යවකාශ කාලගුණය පිළිබඳ හදාරන්නටයි. මේ සිදුරුවලින් සූර්ය අංශු රැගත් අධි වේගී සුළං හමා එනවා. මේවා සමහර විට වෙනත් තැන්වලින් හමා එන සුළංවලට වඩා මේ තෙගුණයක් වේගවත්.

බැලූ බැල්මට අභ්‍යවකාශ කාලගුණය අපට එතරම් වැදගත් දෙයක් ලෙස පෙනෙන්නේ නැහැ. ඒත් මේ වසරේ මුලදී පළ වූ බි‍්‍රතාන්‍ය ඉංජිනේරුවන්ගේ රාජකීය ඇකඩමියේ වාර්තාවෙන් පෙන්වා දුන්නේ සූර්යයා තුළ ඇති වන සුපිරි කුණාටු නිසා පොළොවේ කි‍්‍රයාකාරකම්වලට ඇති විය අවදානම පිළිබඳ අවධානයක් දක්වා කටයුතු කිරීම අත්‍යවශ්‍ය බවයි.

සූර්යයාගේ හැලහැප්පිලි නිසා වෙනස් වන අභ්‍යවකාශ කාලගුණය මිහිමත විදුලි බලශක්ති ජාලයන්ට, චන්ද්‍රිකා කටයුතුවලට, ගුවන් ගමන්වලට, ජීපීඑස් පද්ධතිවලට වගේම පෘථිවියේ ජංගම දුරකතන සන්නිවේදන ජාලයට විශාල ලෙස බලපැම් ඇති වෙනවා. ඒ නිසා අභ්‍යවකාශ කාලගුණයෙහි කිව නොහැකි තරම් වැදගත්කමක් අපට තියෙනවා.

මේ සූර්යයාගේ සිදුරේ ඡායාරූප ගත්තේ සූර්ය හා සූර්යගෝලීය නිරීක්ෂණාගාරය (SOHO) යනුවෙන් හැඳින්වෙන අභ්‍යවකාශ යානයෙන්. 1995 දී දියත් කළේ සූර්යයාත් පෘථිවියත් අතර තැනක ස්ථාවරව රැඳී සිටිමින් සූර්යයාගේ කි‍්‍රයාකාරකම් නිරීක්ෂණය කිරීමටයි.


Sinhala Samanartha Pada Koshaya

Buy Sinhala Samanartha Pada Koshaya Book

Nasrudin Books

Buy Nasrudin Books

Zen Book

Buy Zen Book

Post a Comment

0 Comments