Skip to main content

Posts

Showing posts from January, 2013

කළු කුහරයේ මුහුණුවර වෙනස් වේ! අලූත් ම තාරකා විද්‍යාත්මක මතය මෙන්න!

මෙතෙක් කලක් තාරකා විද්‍යාඥයන් සිතා සිටියේ කළු කුහරයක් (black hole) කියන්නේ අවට ඇති සියලූ දේම, ආලෝකය පවා, උරා ගන්නා, කිසිම ආකාශ වස්තුවකට ගැලවී යා නොදී ගිල ගන්නා අඳුරු ආවාටයකටයි. එයට හසුවන ආලෝක කිරණ පවා සදහටම උරා ගන්නා නිසා ඒවා ‘පෙනෙන්නේ’ කළු පාටටයි. ඒ නිසා තමයි, ඒවාට ‘කෘෂ්ණාවාට’ කියලත් කියන්නෙ.

මෙතෙක් සිතා සිටියේ මේ කළු කුහර වටකුරු හැඩයක් ඇතැයි කියා නමුත් ඒවායේ හැඩය ඊට වඩා වෙනස් යැයි දැන් තාරකා විද්‍යාඥයන් විසින් සොයා ගෙන තියෙනවා. ඒත් ඒක ඔප්පු කරන්න හැකි තාක්ෂණයක් තවම සොයා ගෙන නැහැ.

ඇත්ත වශයෙන් නම් කළු කුහර කියන්නේ අදෘශ්‍යමාන දෙයක්. ඒවායේ ගුරුත්වාකර්ෂණය නිසා ආලෝක කිරණ කිසිවකටවත් ගැලවී යන්න පුළුවන්කමක් නැහැ.

ඒත් විද්‍යාඥයන් විශ්වාස කරනවා, ඒවායේ මායිම් තියෙනවා කියලා. ඒ මායිම් සලකන්නේ ඒවා තුළට ඇද ගන්නා සියල්ලේම අවාසනය සිදු වන අද්දරක් හැටියටයි. ඒ කළුකුහර තුළට ඇද ගන්නා මොහොතේ එම ද්‍රව්‍යවලින් නිකුත්වන විකිරණවලින් ඒ මායිම් අපට දැක ගන්න පුළුවන්.

කළුකුහරයක හැඩය වක් අඩසඳක් වගෙයි, කියලයි විද්‍යාඥයන් දැන් කියන්නෙ. බර්ක්ලේහී තාරකා විද්‍යාඥයන් අපේ ක්ෂීරපථය මැදින් ධනු රාශිය ඔස්සේ පෙනෙන ‘සැජිටේරියස්…

ප‍්‍රථම වරට වසර 2000ක් පැරණි හිස් කබලකින් මුහුණක් මවයි!

වසර 2000කට පෙර සිටි රෝම වංශවතකුගේ මුහුණක් හිස් කබලක් තුළින් ප‍්‍රතිනිර්මාණය කිරීමට විද්‍යාඥයන් සමත් වී තියෙනවා. බි‍්‍රතාන්‍යයේ නිව්පෝට් අසලින් ගොඩ ගත් ගලින් තැනූ මිනීපෙට්ටියක් ඇතුළේ තමයි, මේ හිස් කබල තිබී ඇත්තේ.

බි‍්‍රතාන්‍ය බලකොටුවක් තුළ දී මියගිය ඔහු එකල රෝම අධිරාජ්‍යයේ සිටි ධනවතෙක්. සමරවිට ඔහු රෝම හමුදාවේ සිට විශ‍්‍රාම ගිය ප‍්‍රධානියකු වෙන්නත් පුළුවන්. මිය යන විට ඔහුගේ වයස අවුරුදු 40ක් විතර වෙන්න ඇති.
ඔහුගේ ඇටසැකිල්ල තිබුණේ ගලින් කළ මිනීපෙට්ටියකයි. දකුණු වේල්සයේ නිව්පෝට් අසල කලියන්හි පිහිටි පැරණි රෝම බලකොටුව ආසන්නයේදි තමයි පොළොව කණින කොටයි මේ ගල් මිනීපෙට්ටිය මතුවෙලා කියෙන්නෙ.

වසර 2000ක් පැරණි වංශවතාගේ රූපය නවීන තාක්ෂණය යොදා ගෙන නිමවා ඇති අයුරු.

අපූරු සැත්කමකට සූදානම් වන ‘පුරු පුරු’වෙක්! උපතින් ලැබෙන ආබාධයකට පිළියම්!

මෙයාගෙ නම හාවි. හාවි කිව්වට මෙයා හාවියක් නෙවෙයි, මාස හතරක් වයසැති පූස් පැටියෙක්! මේ පින්තූර දැක්කාම ඔබ හිතාවි මේ පූස් සුරතලා බොහොම අසීරුවෙන් දුකින් ජීවත් වෙනව කියලා.

ඒත් එහෙම එකක් නෑ. මේ මෙයා ලබා උපන් හැටි! එයාට ඒකෙ ඇති අසීරුවක් ගැන තේරුමක් නෑ. ඉන්න විදිය ගැන එයා හරිම සතුටින් ඉන්නෙ.

මේ හාවි කියන පූස් පැටියට තාම වයස මාස හතරයි. ඉදිරි පාදවල අස්ථි නැතත් ඌ සෙල්ලම් කරමින් විනෝද වෙනවා.

ඩොල්පින් මාළුවෙක් මුහුද යටදී කිමිදින්නකු ගෙන් උදවු ඉල්ලයි! සාගර පත්ලේ සිදු වූ විස්මිත සිද්ධියක්!

අපි මේ වන තෙක් කොතෙකුත් අසා ඇත්තේ ඩොල්පින් මසුන් මුහුද මැද දී අපට කළ උදවු ගැන කතාන්තරයි. ඩොල්පිනුන් මුහුද මැද අතරමං වූ යාත‍්‍රාවලට පාර පෙන්නූ හැටි, මුහුදේ ගිලෙන්න ගිය අය බේරා ගොඩට ගෙනා හැටි ඒ කතා අතර වඩාත් මතක හිටින ඒවායි.

ඒත් පසුගිය දා අපට අහන්නට ලැබුණේ ඊට වඩා වෙනස් කතාවක්. ඒ ඩොල්පින් මාළුවකු මිනිසකු ගෙන් උදවු ඉල්ලූ අවස්ථාවක් ගැන අපූරු කතාවත්.

මෙසේ උදවු ඉල්ලා ඇත්තේ බිලී කොක්කක් හා මාළු දැලක් පැටළුණු ඩොල්පිනයෙක්. ”බිලී කොක්කට තුවාල වුණු ඌ වේදනාවෙන් හිටිය බව දකින කොටම මට තේරුණා.” කිමිදුම්කරු ඒ අත්දැකීම විස්තර කරමින් කියනවා.

ඩොල්පින් කෙළින්ම උදවු ඉල්ලා ගෙන ඔහුගේ ළඟටම ආවා.

කොළ එළවළු හා කහ පලතුරු කන අයගේ සතුට වැඩියි! අලූත්ම පර්යේෂණයකින්!

කොළ පැහැති එළවළු පලතුරු කන අයට හැම දෙයක් ගැන සුබවාදීව හිතන්න පුළුවන් වෙනව කියල පර්යේෂණයකින් සොයා ගෙන තියෙනවා.

විද්‍යාඥයන් දැන් සොයා ගෙන තියෙන විදියට කහ සහ කොළ පැහැති පලතුරු හා එළවළුවලින් ලැබෙන කැරෝටීන පෝෂකය රුධිරයට එක්වීම නිසා අනාගතය සුබවාදීව දකින්නත්, ඒ නිසාම ජයග‍්‍රාහීව ජීවත් වෙන්නත් ඒ අයට හැකියාව ලැබෙනවා.

මේ පෝෂකය සාමාන්‍යයෙන් හැඳින්වෙන්නේ බීටා-කැරෝටීන කියලයි. සිරුර තුළ දී විටමින් ඒ තැනීමට උපකාර වන්නේ මේ කැරෝටීනයයි. මේවා වැඩිපුරම හමු වන්නේ කහ පැහැති පලතුරුවල හා කොළ පැහැති එළවළු හා පලා ආදියෙහියි.

විද්‍යාඥයන් සොයා ගෙන ඇත්තේ කහ සහ කොළ පැහැති එළවළු හා පලතුරුවලින් ලැබෙන අධික කැරොටීන ප‍්‍රමාණය නිසා සර්වශූභවාදීව ජීවත් වීමට ඉඩ සැලසෙන බවයි.

අපූරු අපි‍්‍රකානු මිතුරියන් දෙදෙනා : අපි‍්‍රකානු ජනකතා

එක් ගමක තරුණ මිතුරියෝ දෙනෙක් සිටියහ. දෙදෙනාම අඳින්නට කැමති එක විදියේ ඇඳුම්ය. කන්නට කැමැති එකම කෑම වර්ග ය. වතුර ගෙනෙන්නට ගියේ එකම වෙලාවට එකම ළිඳටය; එකටය.වෙන ගමන් බිමන් යන්නේත් එකටමය.

ඒ යාළුකම තැන කවුරුත් නිතර කතා බහ කළහ. ගමේ අය සිතා සිටින තරම් ම පුදුම යාළුකමක් ඒ තරුණියන් දෙදෙනා අතර තිබෙන බව විශ්වාස කරන්නට කැමති නොවුණු තරුණයෙක් දිනක් මෙසේ කීය:

”කවදාවත් නොකැඩෙන පුදුම යාළුකමක් ඔය දෙන්න අතර තියෙනවද කියල මම බලන්නං.”
තරුණයා මග බලා සිට තරුණියන් දෙදෙනා හමු විය.

”පොඞ්ඩක් නවතින්න! මට ඔය දෙන්නගෙන් එක්කෙනකුට කියන්න දෙයක් තියෙනවා.”

”දෙන්නටම ඇහෙන්න කියන්න! අපි දෙන්න හොඳටම යාළුයි.”

”බෑ! බෑ! මම එක්කෙනකුට කියන්නං! එයාගෙන් අනිත් එක්කෙනාට අහගන්න පුළුවන්.”

පොළෙන්නරුවට වැටුණු උල්කා වැස්සෙන් ආ සක්වළ ජීවී සලකුණු! ශී‍්‍ර ලංකා විද්‍යාඥයකුගේ සොයා ගැනීමක්!

උල්කා වර්ෂාවකින් පොළොවට වැටුණු උල්කාපාත කැබැල්ලක් පළා බැලූ අපේ විද්‍යාඥයෙක් ඒ තුළින් පිටසක්වළ ජීවීන් ඇතැයි සාක්ෂි එයින් හෙළි වන බව පසුගියදා ප‍්‍රකාශ කළා.

මේ බව හෙළි කරන්නේ බි‍්‍රතාන්‍යයේ වෙසෙන ශී‍්‍ර ලාංකික විද්‍යාඥයකු වන මහාචාර්ය චන්ද්‍රා වික‍්‍රමසිංහයි. ඔහු මහාචාර්යවරයකු වශයෙන් කලින් කාඩිෆ් විශ්ව විද්‍යාලයේ සේවය කළා. ඔහු පරීක්ෂා කර බැලූ අඟල් දෙකක් පමණ වන ඒ ග‍්‍රහක කැබැල්ල තුළ තිබී පෘථිවියේ දක්නට ලැබෙන ක්ෂුද්‍ර මුහුදු ශාක විශේෂයක පොසිල ඔහු විසින් හඳුනා ගෙන තියෙනවා.

”මෙයින් තහවුරු කර ගන්න පුළුවන් වේවි මිනිසාගේ ජීවය ආරම්භ වූයේ පෘථිවියෙන් බැහැර සක්වළින් බව.” යැයි කියන අපේ මේ මහාචාර්යවරයා අපේ පෘථිවියට ජීවය ආවේ පිටසක්වළෙන් යැයි කලින් මහත් ආන්දෝලනයක් ඇති කළ න්‍යායක් ඉදිරිපත් කළ කෙනෙක්.

මහාචාර්ය චන්ද්‍රා වික‍්‍රමසිංහ අභ්‍යවකාශයෙන් ආ ඒ ග‍්‍රහක කැබැල්ල පිරික්සමින්.

වැටෙන හිම පියල්ලේ නියම හැඩරුව දකින්න!

වැටෙන හිම පියල්ලේ නියම හැඩරුව දකින්න දැන් පුළුවන්. ඒ සඳහා විශේෂ ති‍්‍රමාන රූ ගත හැකි නව ආරක කැමරාවක් දැන් තනා තියෙනවා.

සුදේ සුදට හිම වැටෙන කොට හරිම ලස්සනයි. විවිධාකාර හැඩතල ඇති හිම පියලි පතිත වෙනව දකින හිම නොවැටෙන රටවල ඉන්න අයට ඒ දසුන නෙතට රසඳුනක් වුණාට හිම වැටෙන රටවල අයට එය වේදනාකාරී අත්දැකීමක්. මහ විපතක්!

පසුගිය දවස්වල එංගලන්තයට හිම වැටිලා එවැනි මහ විපතක් සිදු වුණා. මහ ගමනාගමනය විතරක් නෙවෙයි, ගුවන්ගමන් පවා නතර වුණා. ගුවන්තොටුපළවල මගීන් දහස් ගණනින් හිරවෙලා හිටියා.

ඒ අතර එවැනි විපතක් සැපතක් කර ගත් පිරිසකුත් ලෝකයේ හිටියා. ඒ ඇමෙරිකාවේ සෝට් ලේක් සිටි නගරයේ පිහිටි යූටා විශ්ව විද්‍යාලයේ පර්යේෂක කණ්ඩායමක්.

ඔවුන් නිර්මාණය කරල තියෙනවා හිම පියලිවල හැඩතල ඡායාරූප ගන්න පුළුවන් විශේෂ කැමරාවක්. එය ‘මල්ටි ඈන්ගල් ස්නෝෆ්ලේක් කැමරාවක්’. (Multi-Angle Snowflake Camera -MASC) එහි අරුත ‘බහු කෝනී හිම පියලි කැමරාවක්’ යන්නයි.

හිම පියලි ති‍්‍රමානව රූපයට නැඟිය හැකි ‘බහු කෝනී හිම පියලි කැමරාව.’ මේ මගින් ගන්නා රූපවලින් ඉතා නිවැරදිව හිම කුණාටු ගැන අනාවැකි කියන්න පුළුවන්.

අතීත ලංකාව දකින්න - පැරණිම වර්ණ චිත‍්‍රපටයකින්!

අද කොළඹ කොටුවේ චැතම් වීදිය හා එහි මුදුනේ ඇති ප‍්‍රදීපාගාරය සහිත ඔරලෝසු කනුව පිහිටි ප‍්‍රදේශය දුටුවොත් ගහක් කොළක් නැති ගොඩනැගිලිවලින් පිරි එකක් බව ඔබට පෙනේවි. එහෙත් මීට වසර සීයකට විතර ඉස්සර ඒ විදිය ගහ කොළවලින් යුත් චිත්තාකර්ෂණීය එකක්.

අපේ අතීතය අපට අපේ අනාගත පරපුරට දැක ගත හැකි වන්නේ එක්කෝ ඡායාරූප මගින් නැත්නම් වාර්තා චිත‍්‍රපට මගින්. ඒ විදියෙ වාර්තා චිත‍්‍රපටයක් අපට අන්තර්ජාලයෙන් හමුවුණා. එය 1933 දී වර්ණයෙන් නිෂ්පාදිත කෙටි වාර්තා චිත‍්‍රපටයක්. මෙවැනි චිත‍්‍රපට අප කුඩා කල දුටුවේ ඉංගී‍්‍රසි චිත‍්‍රපට ප‍්‍රදර්ශනය කළ සිනමාහල්වල ප‍්‍රධාන චිත‍්‍රපටය පෙන්වන්නට පෙර කාලය තුළදියි.

සිංහල සිනමාව අද 66 වසරක් සපුරයි. එදා අපේ ප‍්‍රථම නිළිය වූ රුක්මණී දේවිට සිංහල අකුරක්වත් කියවන්න බැහැ!

සිංහල සිනමාවට අදට අවුරුදු 66ක්. මුලින් ම සිංහල චිත‍්‍රපටයක් මෙරට සිනමා හල්වල ප‍්‍රදර්ශනය වූයේ 1947 ජනවාරි 21 වැනිදායි. ‘කඩවුණු පොරොන්දුව’ නම් වූ එම චිත‍්‍රපටය ප‍්‍රදර්ශනය කෙරුණේ කොළඹ කිංස්ලි සිනමා ශාලාවේදියි.

1946 දී ඉන්දියාවේ මදුරෙයි නගරයේ දී එහි නිෂ්පාදන කටයුතු ඇරඹුණේය. එහි අධ්‍යක්ෂවරයා වූයේ බෙංගාලි ජාතික ජ්‍යෝතිශ් සිං ය. සංගීත අධ්‍යක්ෂ වූයේ දකුණු ජාතිකයකු වූ නාරායන අයියාර් ය. එහි නිෂ්පාදකයා වූයේ එස්. එම්. නායගම් ය. (මේ පිළිබඳ දීර්ඝ විස්තරයක් 2012 ජනවාරි 21 වැනිදා ‘මල් කැකුළු’ තුළින් ‘සිංහල සිනමාව’ නම් ලිපියෙන් ඉදිරිපත් කළා.)

අලූත්ම නිපැයුම සිරුර සම්භානය කරන රොබොට්ටෙක්! පුංචි සෙල්ලම් කාරෙකක් වගේ මෙවලමක්!

රෝදවලට උල් කටු සවි කරල තියෙන රොබෝ කාරයක් ඔබේ කොන්ද දිගේ යනවා කීවාම ඔබේ හිත එකපාරටම ගැස්සිලා යන්න ඉඩ තියෙනවා.

ඒ කොහොම වුනත් ඇමරිකානු රොබොට්ටන් තනන සමාගමක් වූ ‘යූඑස් රොබටික්ස්’ ආයතනය කියනවා මේ ‘වීමී රොබොට්ටා’ (WheeMe) අනාගතයේ දිනෙක සිරුරු සම්බාහකයාගේ තැන ගන්නා බව ඔවුන්ට විශ්වාසයි කියලා.

‘වීමී රොබොට්ටකු’ රුපියල් 12,000 විතර මිලකට වෙළඳ පොළෙන් ගන්නට ඔබට හැකි වේවි. ඔබේ සිරුර හොඳින් සම්බාහනය කරන්න හැකි වන විදියට මෙහි රෝද උල් තුඩු සහිතව නිර්මාණය කර තියෙනව විතරක් නෙවෙයි, සිරුර මෘදුව පිරිමදින්නට හැකි ‘කැරකෙන ඇඟිල්ලක්’ වගේ උපාංගයකුත් ඊට ඇතුළත් වෙනවා.

‘වීමී’ රොබොටික සම්බාහන මෙවලමට පුළුවන් ඔබේ කොන්දේ අමාරුව සම්බාහනයෙන් නැති කර දෙන්න. ඒ සඳහා විශේෂයෙන් සැලසුම් කළ රෝද තියෙනවා.

රෝහල්වල ආසාදන ඇතිවීම් වළක්වා ලීමට හැකියාව ඇත්තේ මාළුන් ළඟයි! අලූත් ම අධ්‍යයනයකින් හෙළි වෙයි!

මාළුන්ගේ කරමල්වල ඇති රසායනයක් මේ සඳහා උපයෝගී කර ගත හැකි බව ඒ නව අධ්‍යයනය කළ පර්යේෂකයන් කියනවා. මෙය කළ හැකි වන්නේ රෝහල් බිමට එම රසායනය ආලේප කිරීමෙනුයි.

රෝහල්වල ආසාදනවලට බොහෝ විට හේතුවන බැක්ටීරියා වර්ග විනාශ කිරීමට මාළුන්ගේ කරමල්වල ඇති රසායන තමයි, මෙසේ උපයෝගී කර ගත හැක්කේ.

බැක්ටීරියා හා දිලීර වර්ගවලින් ගහණ වූ පරිසරවල ජීවත්වන මාළුන්, ජලයෙන් පැතිරෙන රෝගකාරක වලට එරෙහිව ප‍්‍රබල ප‍්‍රතිශක්තියක් ලබා දිය හැකි ප‍්‍රතිමයික්‍රොබියල් පෙප්ටයිඞ් වර්ග ඔවුන්ගේ කරමල්වල නිපදවා ගැනීමට සමත් වී තිබෙනවා.

ඇමරිකාවේ මැසචුසෙට්ස්වල වෝසෙස්ටර් බහුතාක්ෂණ ආයතනයේ පර්යේෂකයන් පිරිසක් තමයි, මේ නව සොයා ගැනීම කරල තියෙන්නෙ. ඒ එක් පෙප්ටයිඞ් වර්ගයක ජෛව යාන්ත‍්‍රණය අධ්‍යයනය කරද්දීයි. ඒ පෙප්ටයිඞ් වර්ගය රෝහල් ගොඩනැගිලිවලට යොදන ටයිල්වලට එක් කිරීමෙන් බැක්ටීරියා විනාශ කළ හැකි බව සොයා ගෙන තියෙනවා.

මේ අත්ලාන්තික් සැමන් වර්ගය, බැක්ටීරියා දිලීර බහුල පරිසරවල ජීවත්වන නිසා ජලයේ ඇති රෝගකාරකවලින් බේරීමට ඔවුන්ගේ කරමල්වල විශේෂ ඇන්ටිමයික්‍රෝබියල් පෙප්ටයිඞ් වර්ග නිපදවනවා.

මෙන්න රියැදුරකු නැතිව දුවන විස්මිත කාරය! අනාගත මහමඟට දැන්ම පිවිසෙන්න!

පසුගියදා ඇමරිකාවේ ලස් වේගාස්හී පැවති ඉලෙක්ට්‍රොනික නව නිපැයුම් ප‍්‍රදර්ශනයේ දී අනාගත කාරය, ‘නව ඕඩි ඒ6’ (Audi A6) රියයි, මේ.

ලස් වේගාස්හී ‘ඉන්ටර්ස්ටේට් 15’ සුපිරි මාවතේ වාහන තදබදය අතරින් මේ සුපිරි ස්වයංකී‍්‍රය රිය එහි ගමන් කළ බි‍්‍රතාන්‍ය මාධ්‍යවේදියා මවිතයට පත් කළා.

බි‍්‍රතාන්‍යයේ ඬේලි මේල් පුවත්පතේ මාධ්‍යවේදී පීටර් ෂෙරිඩන් ඒ අත්දැකීම විස්තර කළේ මෙහෙමයි.

විශ්වයේ ඇති විශාලතම දෙය කුමක්ද? බි‍්‍රතාන්‍ය තාරකා විද්‍යාඥයන්ගේ විස්මිත හපන්කමක්!

මේ විශ්වයේ ඇති විශාලතම ව්‍යුහය ලෙස සැලකිය හැකි දෙය සොයා ගත් විද්‍යාඥයන් මෙතෙක් කලක් මෙය නොපෙනුනේ කෙසේදැයි මවිතය පළ කරනවා. මේ දෙය කෙතරම් විශාල ද කීවොත් මෙහි එක් අන්තයක සිට ආලෝකයේ වේගයෙන් ගියොත් අනෙක් අන්තය දකින්නට වර්ෂ බිලියන 4ක් ගත වෙනවා.

මේ විශාලතම දෙය අන් කිසිවක් නොව දැවැන්ත ක්වොසාර් කාණ්ඩයක්. ඒවා හැඳින්වෙන්නේ ‘එල්කිව්ජී’ (LQG) නමින්. එය විශ්වයේ ආරම්භය සිදුවූ කාලයේ පැවැති ගැලැක්සීවලින් සමන්විත ව්‍යුහයක්.

මේ විශේෂ ක්වොසාර් කාණ්ඩය කොයිතරම් විශාල ද කීවොත් නවීන විශ්ව විද්‍යාවේ න්‍යායන්ටත් අභියෝගයක් වන තරම් යැයි පර්යේෂකයන් කියනවා.

චිත‍්‍රශිල්පියකුට පෙනෙන ක්වොසාරය. ULAS J1120+0641 යනුවෙන් හැඳින්වෙන එය කළු කුහරයකින් ශක්තිය සැපයෙන ඉතා දුරින් පිහිටා ඇති ක්වොසාරයක් වන අතර එහි ස්කන්ධය හිරු මෙන් බිලියන දෙකක ගුණයකටත් වැඩි යැයි කියැවේ.

නස්රුදින් සොයා යාම!

නස්රුදින් ගැන වචනයක්!
නස්රුදින් කතා තුනක් ‘බුන්දි වෙබ් අඩවියේ ’ පළ කරලා තිබුණා. ඒ පළ කරලා තිබුණෙ මගේ මුල්ම ‘නස්රුදින්’ පොතේ ආ කතා තුනක්. ‘නස්රුදින් සත්‍යය දුටු හැටි සහ තවත් කතා’ කියන සිරස යටතෙ. අද අපේ සමාජයේ පවතින තත්වයට ඒ කතා වඩාත් හොඳට ගැළපෙන නිසා ඒවා පළ කිරීම ගැන මං සතුටුයි. ඒ වගේ ම උපුටා ගැනීම ගැන සඳහන් කිරීම ගැන ඒ අයට පින්! (ඒ කතා ඇතුළත් නස්රුදින් පොතේ අලූත් ම මුද්‍රණයක් ගුණසේන සමාගමෙන් නව වසරට නිකුත් කරල තියෙනවා.)

මීට වසර 850කට විතර ඉස්සර මැදපෙරදිග සිටිය චරිතයක් වුනත් වර්තමානයේ අපටත් ඔහු කළ කී දෑ තුළින් විනෝදයකුත් ඇතැම් විට දැනුමකුත් ලැබුණු නිසා මීට දසක හතරකට පෙර මං ඒ කතා එකතු කරලා ‘නවයුගය’ සඟරාව ඔස්සේ සිංහල පාඨකයන්ට දුන්නා. එදා ඉඳලා මට නස්රුදින් කතා කියන පුරුද්ද අත අරින්න බැරි වුණා. ඒ නිසයි, ‘මල් කැකුළු’ තුළින් පවා වරින් වර ඒ කතාවක් දෙකක් ඔබටත් කියන්නෙ.

- පර්සි ජයමාන්න.

අන්තර්ජාලය නිසා ළමයින්ගේ නිර්මාණශීලිත්වය මොට වෙනවා! ලෝක ප‍්‍රකට නව නිපැයුම්කරුවෙන් කියනවා!

බි‍්‍රතාන්‍යයේ ප‍්‍රමුඛ පෙළේ නව නිපැයුම්කරුවෙක් අනතුරු ඇඟවීමක් කරලා තියෙනවා, අන්තර්ජාලය ළමයින්ගේ මොළය අකි‍්‍රය කරනවාය, ඒ නිසා අනාගත පරපුර, ඒ කියන්නේ ගූගල් පරම්පරාව, නිර්මාණශීලීත්වයෙන් ඈත්ව යනවාය කියා.

මෙහෙම කියන්නේ ටෙ‍්‍රවර් බේලිස් (Trevor Baylis) කියන ලෝක ප‍්‍රකට නිර්මාණකරුවායි. (ඔහු තමයි, වයින් කරන ගුවන් විදුලිය ලොවට දායාද කළේ. විදුලිය හෝ බැටරි හෝ නැති ප‍්‍රදේශවල දී පාවිච්චි කළ හැකි ඒ ගුවන් විදුලි යන්ත‍්‍රය පමණක් නොව ආබාධිත අයට ප‍්‍රයෝජනවත් නිර්මාණ රැසක් ඔහුගේ නමට තියෙනවා.)

ඔහු පවසන විදියට ළමයින්ගේ නිර්මාණශීලීත්වය විතරක් නෙවෙයි, ප‍්‍රායෝගික කුසලතාව ද දැන් ළමයින් අන්තර්ජාලයට ඇබ්බැහි වීම නිසා දැන් වියැකෙමින් පවතිනවා.

75 හැවිරිදි වියේ පසුවන ඔහු කියන්නේ නව ළමා පරපුර ගූගල් තිරයේ ඇස් අලවා ගෙන සියල්ල පහසුවෙන් එතැනින් ලබා ගෙන ජීවිතය ගෙන යාමේ පුරුද්ද නිසා ඊළඟ පරම්පරාවට නව නිපැයුම්කරුවන් අහිමි වී යන බවයි. ඔවුන්ට තමන්ගේ ඇඟිලි තුඩු මෙහෙයවා යමක් නිර්මාණය කිරීමේ හැකියාවක් නැති බවයි.

වයින් කරන රේඩියෝව නිපදවූ බි‍්‍රතාන්‍ය ජාතික නිර්මාණකරුවා - ටෙ‍්‍රවර් බේලිස්.

සැපට නිදා ගන්න ඉලෙක්ට්‍රොනික් උපකරණයක්! අයිස්ලීප් වෙනුවෙන් කාන්තාවකට සම්මානයක්!

අයිස්ලීප් (iSleep) නමින් තැනූ නව උපකරණයකටයි, මේ සම්මානය හිමි වුණේ. ඒ පසුගියදා ඇමරිකාවේ ලාස් වේගාස්වල පැවති ලෝක ඉලෙක්ට්‍රොනික ප‍්‍රදර්ශනයෙදියි. කාටවත් වදයක් නොවී නිදි යහනේ පාවිච්චි කළ හැකි උපකරණයක් ලෙසයි මෙය හඳුන්වා දී තිබුණේ.

ඇගේ නිර්මාණය වූයේ බාහිර ශබ්දවලින් මිදී සුව නින්දක් නිදා ගත හැකි අමුතුම තාලේ සිරස් පටියක්. සිතට සහනයක් ගෙනෙන සංගීතයක් අසන්නට සැලැස්විය හැකි උපකරණයක්. ඒ වගේම සැමියාට වදයක් නොවී නිදි යහනේ සිටම ජංගම දුරකතනය පාවිච්චි කළ හැකි හෙඞ්ෆෝනයක්. මේ සියල්ලම එකට එකතු කළ දෙයක් තමයි ‘අයිස්ලීප්’ කියන්නේ.

මේ සිරස් පටිය පැලඳ ගත්තාම එහි ඇති කුඩා ඉයර්ෆෝනවලින් දෙදෙනා එකිනෙකාට බාධාවක් නැතිව ඕනෑම දෙයකට ඇහුම්කන් දුන්නෑති. ඒ නැති වෙලාවට බාහිර ශබ්දවලින් බාධාවක් නැතිව හොඳින් නිදා ගත්තෑකි.

කැනඩා විද්‍යාඥයන් පිරිසක් මිනිස් මොළයට සමාන පරිගණක මොළයක් නිපදවලා! ඒ අනුකාරක මොළයට අපි කරන හුඟක් දේ කළ හැකියි!

විද්‍යාඥයන් මෙතෙක් නිර්මාණය කරන ලද ‘හොඳම කෘති‍්‍රම (මිනිස්) මොළය’ ගැන පසුගිය දා හෙළිදරවු කළා. මේ මොළය හඳුන්වා ඇත්තේ ‘ස්පෝන්’ (Spaun) කියායි. එයට ගණන් කරන්නත් බුද්ධි පරීක්ෂණ ප‍්‍රශ්නවලට උත්තර දෙන්නත් පුළුවන්.

එසේ හැඳින්වෙන්නේ ‘අර්ථවිචාර දැක්විය හැකි පරිගණක සාංකල්පික ව්‍යුහයක් ඇතුළත් සංජාලය’ යන අරුත් දෙන ‘සෙමන්ටික් පොයින්ටර් ආකිටෙක්චර් යුනිෆයිඞ් නෙට්වර්ක්’ (Semantic Pointer Architecture Unified Network) වදන් වැල ඇසුරෙන් වහරනු පහසුවට එහි ඉංගිරිසි මුලකුරු එක්කොට තනාගත් අක්නම (acronym) කින්.

මේ ස්පෝන් කියන අනුකාරක මොළය කි‍්‍රයාත්මක වන්නේ සුපිරි පරිගණකයකින්. එහි ඩිජිටල් ඇසක් තියෙනවා. එයින් තමයි දෘශ්‍ය ආදන (visual input) ලබා ගන්නේ, එනම් දකින දෑ ග‍්‍රහණය කර ගන්නේ.

ඊට රොබෝටික අතක් තියෙනවා. එයින් තමා ප‍්‍රතිචාර ලියා දක්වන්නේ. මේ මොළය කෙතරම් දියුණු එකක්ද කීවොත් එයට මූලික බුද්ධි ඵල පරීක්ෂණයකින් සමත් වීමටත් පුළුවන්.
පරීක්ෂණයකදී මේ ස්පෝන් මොළය තමන්ට පෙන්වන ඉඟියක් ඇසින් ගෙන එය කඩදාසියක නැවත සටහන් කරන්න ඇති හැකියාව පෙන්වා තියෙනවා.

මෙන්න! පළමුවරට කැමරාවට නැඟුණු යෝධ දැල්ලා!

ජපන් සිනමා කණ්ඩායමක් මුහුද යට උගේ වාසබිමටම ගිහිල්ලා මේ දැල්ලා කැමරාවට අල්ලා ගත්තා!

මෙතෙක් අප දැන සිටියේ මේ යෝධ දැල්ලන් ගැඹුරු මුහුදේ සැඟවී සිට හදිසියේ මතුපිටට විත් පහර දෙන බිහිසුණු සතුන් විශේෂයක් ලෙස ඔවුන් පිළිබඳ ගෙතුණු කතාවලිනුයි.

නෝර්වේ අවට මුහුදේ ක‍්‍රාකන් (Kraken) නමින් යෝධ දැල්ලකු විසූ බවත් ඌ ඒ මුහුදේ යාත‍්‍රා කළ නැව් හා නැවියන් අල්ලා විනාශ කළ බවත් ඒ දැල්ලා වටා ගෙතුණු කතාවලින් කියැවුණා.

මෙතෙක් යෝධ දැල්ලා, කතා කියන්නන්ගේ මෙන්ම ස්වභාවවිද්‍යාඥයන්ගේත් සිත් ඇදගත් මාතෘකාවක් වුණත් දැන් ප‍්‍රථම වරට අපට ඌව උගේ ජීවන පරිසරය තුළම දැක ගන්න පුළුවන් වෙලා තියෙනවා.

මේ ස්වර්ණමය අවස්ථාව අපට ලැබිලා තියෙන්නේ ජපන් ජාතික සිනමා කණ්ඩායමක් ඌ සොයා මුහුද යටට ගිය ගවේෂණ චාරිකාවක් නිසයි.

තිදෙනකු රැගෙන යා හැකි කුමුදුවකින් උතුරු පැසිපික් සාගරයේ පත්ල නිරීක්ෂණය කරද්දී අඩි 2066ක් (මීටර 630ක්) පමණ ගැඹුරේදී දැල්ලා කැමරාවට අල්ලා ගන්නට ඔවුන් සමත් වෙලා තියෙනවා. ඒ සතාව වීඩියෝ ගත කළ පළමුවන වතාව මෙයයි.

අඩි 10ක් දිග මේ යෝධ දැල්ලා හමු වී ඇත්තේ උතුරු පැසිපික් සාගරයේදියි.

උත්තර ධ‍්‍රෑවය ආසන්නයට ගොස් බිහිසුණු අත්දැකීමක් විඳ ගන්න! සීත හිමේදී කුසගින්නෙන් පෙළෙන දැවන්ත හිම වැලහින්නියකට මුහුණ දෙන්න!

ඔබ වැන්නකු යෝධ ධ‍්‍රැව වලසකුගේ කටකට අහුවුණොත් කොහොමට හිටීවිද? අභීත වනජීවී කැමරාකරුවකු මුහුණ දුන් ඒ අති ත‍්‍රාසජනක මොහොත අත් විඳින්නට ඔබත් කැමති ද? එහෙනම් මෙන්න ඒකට අවස්ථාවක්!

බීබීසී වනජීවී කැමරා ශිල්පියකු මිනිත්තු 45ක් තිස්සේ මුහුණ දුන් බිහිසුණු මොහොත, දැඩි කුසගින්නේ සිටි හිම වැලහින්නියක තමාටත් දරුවන්ටත් ඔහුව දවල් ආහාරය කර ගන්නට තැත් කළ ඒ මොහොත මෙතෙක් මිනිසකු මුහුණ දුන් මාරන්තික මොහොත වූවා නිසැකයි.

දරුණු ලෙස කුස ගින්නෙන් පෙළුණු ඒ හිම වැලහින්නිය ලෝකයේ සතුන් ගොදුරු කර ගන්නා විලෝපිකයන් අතර ඉන්නා දැවැන්තියක්. අඩි අටක් උසයි. බර රාත්තල් 1000ක්.

මිනිත්තු 40ක් ම ඇය සටන් කළා ඒ වනජීවී සිනමාකරුවා රැඳී සිටි ආරක්ෂක කූඩුව කෙසේ හෝ බිඳ දමා ඔහු ගොදුරු කර ගන්නට. කොතරම් නිර්භීත අයකු වුනත් ඔහු ඒ මොහොතේ බිය වූ තරම ඔහුගේ හද ගැස්මට සවන් දීමෙන් ඔබට තේරුම් ගත හැකියි.

බීබීසී වනජීවී සිනමාකරු ගෝඩන් බුකනන් කුසගින්නෙන් පෙළුණු ධ‍්‍රැව වැලහින්නියට මුහුණට මුහුණ දුන් මොහොත.

පිළිහුඩුවකුගේ දුර්ලභ රංගනයක්! මේ ලජ්ජාව කෝඩුකාරකමට ද? නැත්නම් පින්තූර ගත්තෙ කාන්තාවක් නිසා ඇති වෙච්ච එකක් ද?

පිළිහුඩුවා කියන්නේ ඉතාමත් ආකර්ෂණීය කුරුල්ලෙක්. අවුරුද්දේ මේ කාලෙදි තමයි, ඌ බිත්තර දමන්නේ. නියරක හෝ පස් කණ්ඩියක හෝ ගුළක උණුහුමට බිත්තර රකින කාලෙට දිරච්ච ගසක කොටයක් මතට වී වටපිට බලමින් කිරිල්ලයත් පැටවුනුත් ආරක්ෂාවට රැක සිටින මෙවැනි පිළිහුඩුවන් ඔබ කොතෙකුත් දැක ඇති. ඒත් මේ පිළිහුඩුවා ඊට වෙනස්.

ශී‍්‍ර ලංකාවේ පිළිහුඩු වර්ග ගණනාවක් දක්නට ලැබෙනවා. මල් පිළිහුඩුවා, නිල්කන් පිළිහුඩුවා, පෙරදිග රන් පිළිහුඩුවා, මානාතුඩු පිළිහුඩුවා, ළයසුදු පිළිහුඩුවා, කළු හිසැති පිළිහුඩුවා හා ගෝමර පිළිහුඩුවා ආදී වශයෙන් ප‍්‍රකටව සිටින වර්ග හතක් ඉන්නවා.

අනේ මට මගේ පාඩුවේ ඉන්න දෙන්න! පිළිහුඩුවා ඌව කැමරාවට නගන්න ආ කැමරාකාරිය දැකලා ලජ්ජා හිතිලා වගෙයි.

මෙන්න මේ වසරේ ඔබට ලැබෙන නවතම ඉලෙක්ට්‍රොනික උපකරණ. 2013 පාරිභෝගික ඉලෙක්ට්‍රොනික දැක්ම!

ලෝකයේ ලොකුම ඉලෙක්ට්‍රොනික නිෂ්පාදන ප‍්‍රදර්ශනය පසුගිය දා ඇමරිකාවේ ලාස් වේගාස්වල දී පැවැත්වුණා. මේ ලැබූ නව වසරේ අපේ ආසාවන් සපුරන්න හිතා ගෙන ලෝකයේ ඉලෙක්ට්‍රොනික නිෂ්පදකයන් හැමෝම අලූත් අලූත් නිපැයුම් ඒ සඳහා ඉදිරිපත් කළා.

ඇපල් සමාගම හැර අනෙක් හැම සමාගමක් ම මේ 2013 පාරිභෝගික ඉලෙක්ට්‍රොනික දැක්ම (Consumer Electronics Show) සඳහා නව මෙවලම්, අපූරු ගැජට් රාශියක් ප‍්‍රදර්ශනයට තබා තියෙනවා.

මේ අපූරු ගැජට් අතර, ඔබ කන දේ මොනිටර් කළ හැකි ‘ස්මාට්’ ගෑරුප්පුවක්, මේසයක් හැටියටත් පාවිච්චි කළ හැකි මොනිටරයක්, ඒ වගේ ම විශේෂඥයන් කියන විදියට මේ අවුරුද්දේ ඔබට නැතුවම බැරි අලූත්ම ගැජට් එක වන ‘ෆැබ්ලට්’ (phablet) එකත් කැපී පෙනෙනවා. ‘ෆැබ්ලට්’ කියන්නේ ජංගම ෆෝනයත් ටැබ්ලට් පරිගණකයත් එකට එක් කර තැනූ අමුතුම මෙවලමක්.

මේ තමා එල්ජී ආයතනයේ අලූත්ම ‘අල්ට‍්‍රා එච්ඞී - ඕඑල්ඊඞී’’ ටෙලිවිශනය - මෙහි රූප දැනට පවතින හොඳම ටෙලිවිශනයේ මෙන් හතර ගුණයක් පැහැදිලියි. මේ ගැන අපි නොබෝදා මල්කැකුළු තුළින් හෙළි කළා ඔබට මතක ඇති.

තවත් ග‍්‍රාහක ‘රකුසෙක්’ පොළොව දිහාවට එනවා! හෙට අපේ ග‍්‍රහයා පසු කර ගෙන යාමට නියමිතයි!

අපේ පෘථිවිය පසු කර ගෙන අඩි 900ක් පළල මේ ග‍්‍රහකය හැඳින්වෙන්නේ ‘ඇපොෆිස්’ කියායි. එයට ඒ නම තබා ඇත්තේ ඊජිප්තුවේ හෙවත් මිසරයේ මිථ්‍යා කථාවල එන ඒ නමින් යුත් යක්ෂයකු අනුව යමින්.

විද්‍යාඥයන් කියන විදියට මේ ග‍්‍රහකය අපේ පෘථිවියේ හැපෙන්නේ නැහැ. ඒත් මේ වතාවේ එය පෘථිවිය මග හැර ගියත් 2036 දී යළිත් මතු වී එන විට ඒ වතාවේ නම් පෘථිවිය අසලින් ම යන නිසා එහි හැපෙන්නත් ඉඩ තියෙන බවයි විද්‍යාඥයන් කියන්නේ.

මේ වතාවේ එය පෘථිවියට සැතැපුම් මිලියන නවයක් ඈතින් යන බවටයි ගණන් බලා තියෙන්නේ. මෙය කුඩා ප‍්‍රමාණයේ ග‍්‍රහකයක් වුවත් පෘථිවියේ හැපුනොත් භයානක ප‍්‍රතිඵල ගෙන ආ හැකි බවයි ඔවුන් කියන්නේ.

විශේෂඥයන්ගේ අදහසේ හැටියට ඇපොෆිස් පොළොවෙහි වැදුණොත් ටීඑන්ටී මෙගටන් 500ක් යොදා කරන පිපිරීමකට සමාන පිපිරීමක් ඇති වන බවයි.

සතුරු උවදුරු දුරු කරන්න දළඹුවන්ගෙන් ගැලවිජ්ජාවක්!

දළඹුවන්ගේ අපූරු ලෝකයේ අසිරිමත් වැඩ කිඩ බලන්න! ආත්මාරක්ෂාවට යොදන ක‍්‍රමෝපයයන්! සර්පයින් වාගේ වෙස් වළා ගැනීම්, අප‍්‍රසන්න ගඳ නිකුත් කිරීම්, විෂ විදීම් ආදි නොයක් උපක‍්‍රම හඳුනා ගන්න.

සතුරු විලෝපිකයන් රැසක් සිටින අහිංසකයකුට දරුණු විෂ ඇති සර්පයකු සේ වෙස් වළා ගැනීම කොයිතරම් අපූරු උපක‍්‍රමයක්ද? උකුසුශලබයාගේ දළඹුවා (hawkmoth caterpillar) කරන්නේ ඒකයි.

සතුරු තර්ජනයක් එල්ල වූ විගස ඌ කරන්නේ පාදත් හිසත් සඟවා ගෙන සිරුරේ ඉදිරි පස පුම්බා සර්පයකු සේ මෙසේ පුම්බා ගැනීමයි. සර්පයකුගේ හිස මෙන් පෙනෙන දුඹුරු පාට ඇති කොටස ඇත්තටම නම් දළඹුවාගේ යටිබඩ පෙදෙසයි.

මේ විදියට විලෝපිකයකුගේ ගොදුරක් බවට පත් නොවීමට සර්පයකු ලෙස අනුකරණය එකම දළඹුවා මේ උකුසුශලබ කීටයා පමණක් නොවෙයි. තවත් අය ඉන්නවා.

සතුරකු ළං වෙතැයි දැනුනු විගස උකුසුශලබ දළඹුවා කරන්නේ පාදත් හිසත් සඟවා ගෙන සිරුරේ ඉදිරි පස පුම්බා සර්පයකු සේ මෙසේ පුම්බා ගැනීමයි. බලන්න ඔබට හඳුනා ගන්න පුළුවන්ද කියා. සර්පයාගේ හිස මෙන් පෙනෙන දුඹුරු පාට ඇති කොටස දළඹුවාගේ යටිබඩ පෙදෙසයි.

කමිසයකට රුපියල් ලක්ෂ 29ක් වැය කළ ආදරය සොයන ඉන්දියානු තරුණයෙක්!

ආදරය සල්ලිවලට ගන්න බැහැ කියල කතාවක් තියෙනවා. ඒත් ඒ කතාව විශ්වාස කරන්න කැමති නැති පෝසත් ඉන්දියානුවෙක් ඉන්නවා.

ඔහු මේ ළඟදි කාන්තාවන්ගේ ආකර්ෂණය ගන්න ඇඳුමක් මැස්සෙව්වා. ඒක තනි රත්තරනෙන් කළ එකක්. එකට ගිය වියදම ශී‍්‍ර ලංකාවේ රුපියල්වලින් ලක්ෂ 29ක්!

දැන් 32 හැවිරිදි වියේ පසුව ඔහුගේ නම දත්තා පූගේ. ඉන්නෙ මධ්‍යම ඉන්දියාවේ පිම්පි‍්‍ර-චින්ච්වාද්වලයි. වෘත්තියෙන් ඔහු මුදල් ණයට දෙන ව්‍යාපාරිකයෙක්.

ඔහු වෙනුවෙන් ම විශේෂයෙන් මහපු මේ ඇඳුම සඳහා රන් නූල් තනන්න රන්කරුවන් 15 දෙනෙක් දවසකට පැය 16 ගණනේ සති දෙකක් තිස්සේ වැඩ කළා.

රත්තරන් පෙනුමක්! ඔහු රන් පවුම් 14,000ක් වැය කළා කාන්තා ආකර්ෂණය ලබා ගන්න! ‘මං දන්නවා මං ලෝකෙ ලස්සනම පිරිමියා නෙමෙයි, ඒත් මේ කමිසය ඇන්දාම මං දිහා බලන්න කිසිම කාන්තාවක් අකමැති වෙන එකක් නැහැ.’ ඔහු කියනවා.

මිහිතලයේ ජෛව විවිධත්වය විසිරී ඇති අයුරු දැක්වෙන සිතියම වසර 137කට පසු අලූත් වෙයි!

ලෝකයේ ජෛව විවිධත්වය ව්‍යාප්ත වී ඇති අන්දම දැක්වෙන සිතියම යවත්කාලීන නොවී සිය වසකට අධික කාලයක් ගත වී තිබේ.

මුලින්ම පොළොවේ ජෛව විවිධත්වය විසිරී ඇති අයුරු දැක්වෙන සිතියමක් පිළියෙල කළේ 1876දීයි. ඒ බි‍්‍රතාන්‍ය ජාතික ඇල්ෆ‍්‍රඞ් රසල් වොලස් නම් ස්වභාව විද්‍යාඥයා අතිනි.

ලෝකයේ විවිධ ජීවින් හා ශාක ගණනය කළ නොහැකි ප‍්‍රමාණයක් පරිණාමය වී හා ලොව පුරා ව්‍යාප්ත වී ඇති ආකාරය දැක්වෙන සිතියමක් පිළියෙල කිරීමට ප‍්‍රථම ප‍්‍රයත්නය ලෙස ඔහුගේ ඒ ව්‍යායාමය සැලකිය හැකියි.

නවීන තාක්ෂණයේ ලබා ඇති දියුණුවත් සමග මේ වන විටත් රැස්කර ඇති සත්ව විශේෂයන් 20,000ක පමණ දත්ත ඇතුළත් කර වඩාත් නිවැරදි සවිස්තරාත්මක සිතියමක් සැකසීමට දැන් විද්‍යාඥයන්ට අවස්ථාව පෑදී ඇත.

මේ නව සිතියමට අනුව ලෝකය විශාල ජෛවභූගෝලීය කලාප 11කට බෙදා නම් කර ඇති අතර ඒවා එකිනෙකට සම්බන්ධ වන ආකාරය දක්වා තිබේ.

වගා කිරීමේ නව යුගයක් ආරම්භ වේ! එළවළු වගා කරන්න නගර මැද අහස උසට තැනෙන ගොවිපොළවල්!

මිනිසා මීට වසර 8000කට පමණ පෙර වගා කරන්න පටන් ගත් දා සිට ඉතිහාසයේ සිදු වන විශාලතම පෙරළියට ස්වීඩනය සූදානම් වෙනවා. ඒ නගර මැද ගොවිතැන් කිරීම සඳහා අහස සූරන මැදුරු තනන්නයි. නගර මැද මෙසේ වගා කරන්නට යන්නේ හරිතාගාර ක‍්‍රමයටයි.

බර්ඞ්ස් අයි (Birds Eye) ඇතුළු ආහාර නිෂ්පාදන ආයතන ගණනාවක් ම මේ අහස සුරන හරිතාගාර මැදුරු තැනීම ගැන අවධානය යොමු කර තියෙනවා. ඔවුන්ගේ මේ විමර්ශනවලින් පෙනී ගොස් ඇත්තේ තට්ටු සිය ගණන් උස හරිතාගාරවල එළවළු වගා කිරීම ආර්ථික වශයෙන් ඵලදායී එකක් බවයි. එයින් සරුසාර අස්වැන්නක් ලබා ගන්නවා පමණක් නොව දැනට පවත්නා ඉල්ලූමට සරිලන සේ ආහාර නිෂ්පදනය කළ හැකි බවත් පෙනී ගොස් තියෙනවා.

අහසේ කෙරෙන මේ ‘සිරස් ගොවිපොළ‘ වල සිදු කරන වගාවට පොහොර හා ජලය සැපයෙන්නේ නවතම ක‍්‍රමයකට වන නිසා පසේ අවශ්‍යතාවත් වගා කිරීමට පිටිසර පළාත්වල ගොවිබිම් ආදියත් අවශ්‍ය වන්නේ නැහැ. ජපානය ජලය මත වගා කරන්නෙත් මේ හා සමාන ක‍්‍රමයකටයි.

අනාගතය ඉදි වෙන හැටි. 2014 දී එළවළු නිෂ්පාදනය ඇරඹීමට අපේක්ෂිත ස්වීඩනයේ ලින්කොපින්හී ඉදිවෙන මීටර් 54ක් උස අහස සූරන වගා මැඳුර.

ලෝකයේ මුල්ම වඩුවන් කවුරුන්ද? දැවයෙන් නිම කළ වසර 7,000ක් පැරණි ළිං ජර්මනියෙන් හමු වෙයි!

අවුරුදු 7,000කට පෙර මිනිසා වඩුවැඩ කළ බවට සාක්ෂි දැන් පර්යේෂකයන් පිරිසක් විසින් සොයා ගෙන තිබේ. මේ විස්මිත සොයා ගැනීම කර ඇත්තේ ජර්මනියේ ලීප්සිග් නුවර ආසන්නයේ පිහිටි පුරාවිද්‍යා කැණීම් බිමකදීය.

ජර්මානු පුරාවිද්‍යාඥයන් පිරිසක් විසින් මෙසේ සොයා ගෙන ඇත්තේ වසර 7,000කට පෙර දැව භාවිත කොට ඉදිකෙරුණු ළිං කීපයක නටබුන්ය.

මේ සොයා ගැනීම නිසා මෙතෙක් විශ්වාස කළ පරිදි සංකීර්ණ දැව නිර්මාණ ඉදි කිරීම සඳහා ලෝහ අවශ්‍ය වී යැයි යන මතය බිඳ වැටී තිබේ.

ලීප්සිග් නගරය අසල හමු වී ඇති ඉදි කිරීම් හතර ලොව පැරණිතම දැව ඉදි කිරීම් ලෙස හඳුනා ගෙන තිබේ.

අඟල් 55 ටීවී එකක්! ඝනකම මිමී 4යි! ලෝකයේ ලොකුම ඕඑල්ඊඞී තිරය වෙළඳ පොළේ!

එල් ජී සමාගම මහත් බලාපොරොත්තුවක් තබා ගෙන සිටි විස්මිත ටෙලිවිශන් තිරය සහිත රූපවාහිනිය ලබන මාසේ කොරියාවේ වෙළඳ පොළට එනවා. ඕඑල්ඊඞී තාක්ෂණය නිසා මමී 4ක් පමණක් ඝනකම ඇති ඇදහිය නොහැකි තරම් පැහැදිලි රූප සහිත මේ විශාල තිරය ඇති රූපවාහිනී යන්ත‍්‍රය නිපදවීමට එල්ජීසමාගමට හැකිවී තියෙනවා.

මෙය දැනට මෙම තාක්ෂණය සහිතව වෙළඳ පොළට ලොකුම ටෙලිවිශනයයි. දකුණු කොරියානු නිෂ්පාදන සමාගම කියන්නේ මේ ටෙලිවිෂනයක් කොරියානු වොන් මිලියන 11කට මිල දී ගත හැකි බවයි. ශී‍්‍ර ලංකා රුපියල්වලින් නම් 1,32,000ක්.

දකුණු කොරියානු එල්ජී සමාගම නිපදවා ඇති අලූත්ම ටෙලිවිශනය ඕඑල්ඊඞී තාක්ෂණය යොදා ලෝකයේ විශාලතම හා තුනීම තිරය එකක්. එහි රූප මෙතෙක් නොවූ විරූ තරමට පැහැදිලියි.

දියණිය උපන් මොහොතේ පියා ගත් පින්තූරය අන්තර් ජාලය කළඹයි! වෛද්‍යවරයාගේ අතේ එල්ලී එළියට ආ ළදැරිය මෙන්න!

ජීවිතයේ විස්මිත මොහොතවල් ඡායාරූපයට නැඟීම වාසනාවත් එක්ක සිදු වන දෙයක්. එහෙම වාසනාවක් ලද මාපිය යුවලක් තමන් ගත් ජීවිතයේ අමතක නොවන පින්තූරය ‘මුහුණු පොතේ’ පළ කළා. මොහොතකින් එය අන්තර්ජාලය පුරා ‘කුණාටුවක්’ මෙන් හඹා ගියා.

මෙලොව එළිය දකින්න මොහොතකට පෙර පුංචි නෙවායි මව් කුස හිඳිමින් තම උදව්වට ආ වෛද්‍යවරයාගේ ඇඟිල්ලේ එල්ලූන හැටි!

දුර්ලභ ගණයේ සේයා රුවක්! නවසීලන්තයේ ධීවරයකුගේ නවතම ගොදුරක්!

මෙය ලියැවෙන්නේ කලාතුරකින් හමු වන ඡායාරූපයක් ඔබ වෙත ඉදිරිපත් කරන්නයි. අන්තර් ජාලය පුරා මේ වන විටත් වැඩි දෙනකුගේ අවධානය දිනා ගෙන තියෙනවා.

මේ ඡායාරූපයෙන් කියැවෙන්නේ මිනීමරු සුදු මෝරකුගේ ඉරණම දැක්වෙන කතාවක්. පසුගිය සතියෙදි නවසීලන්තයේ මුහුදේදි ගත්තු එකක්.

2013 වසරේ අහසේ සිදු වන අසිරිමත් දෙයක්! සඳටත් වඩා දීප්තිමත් වල්ගා තරුවක්!

මේ සියවසේ පායන දීප්තිමත් ම ධූම කේතුව මෙයයි. රුසියානු තාරකා විද්‍යාඥයන් දෙදෙනකුගේ සොයා ගැනීමක්.

‘අයිසන්’ නමින් හඳුන්වා ඇති මේ ධූම කේතුව දහවල් කාලයේ දීත් අහසේ දීප්තිමත්ව පෙනෙනු ඇතැයි තාරකා විද්‍යාඥයන් කියනවා.

මෙය මෙතෙක් දක්නට ලැබුණු දීප්තිමත්ම වල්ගාතරුව වනු ඇති. පළමු වතාවට සෞරග‍්‍රහ මණ්ඩලයේ ඇතුළතින් ගමන් කරන එය මේ වසර අග නොවැම්බර් හා දෙසැම්බර් මාසවලදී උතුරු අර්ධගෝලයේ අහසෙහි දීප්තිමත් ම දර්ශනය මවමින් සූර්යයා දෙසට ගමන් කරනු ඇති.

මේ වසරේ අහසේ දක්නට ලැබෙන අසිරිමත්ම දෙය සැලකෙන්නේ අයිසන් නම් වල්ගා තරුවයි. එය 1997 දී පෑයූ ඉහත දැක්වෙන හැලි-බොප් වල්ගා තරුවටත් වඩා දීප්තිමත්ව පෙනෙනු ඇති.