වැලි මල්ලක් එල්ලා විදුලි බලය සපයන නව ක‍්‍රමයක්! ගුරුත්වාලෝකයෙන් දැල්වෙන පහනක්!

විදුලි බල ජාලවට සම්බන්ධව නැති, මෙතෙක් විදුලි බලය නොලැබුණු බිලියන 1.5ක ජනතාවට විදුලි බලය ලබා දිය හැකි ක‍්‍රමයක් දැන් සොයා ගෙන තියෙනවා. ඒ විදුලිය අපට ලැබෙන්නේ ජලයෙන්, ගල් අඟුරු වැනි වෙනත් ඉන්ධනයක් භාවිතයෙන් නොවෙයි. ඒ සැපයෙන්නේ මහ පොළොවේ ඇති ගුරුත්වබලයෙන්.

එය ඔවුන් හඳුන්වන්නේ ගුරුත්වාලෝකය (GravityLight) කියලයි. මෙය ඉපැදවෙන්නේ ගුරුත්ව ශක්තියෙන්. ඒ අනුව ඔවුන් නිපදවා ඇති ගුරුත්ව පහන දැල්වෙන්නේ රැුහැනකින් එල්ලූ වැලි මල්ලකින්. මේ වැලි මල්ල ඩයිනමෝ යාන්ත‍්‍රණයෙන් ක‍්‍රම ක‍්‍රමයෙන් ඉහළට එස වීමේදී ඇති වන ගුරුත්වාකර්ෂණ ශක්තියෙන් එල්ඊඞී (LED) බල්බයක් දැල් වීමට ප‍්‍රමාණවත් විදුලිය ලබා ගත හැකි බව ඒ නිෂ්පාදන සමාගම කියනවා. මෙසේ වැලි මල්ලක් තත්පර තුනක් එසවීමෙන් එල්ඊඞී බල්බයක් තත්පර 30ක් පුරා දැල්වීමට හැකි යැයි ඔවුන් ගිය සතියේ එංගලන්තයේ පුවත්පත්වලට කීවා.

දැනට මෙම විදුලිය ප‍්‍රයෝජනවත් විය හැක්කේ ප‍්‍රධාන විදුලි ජාලවල පහසුකම් නැති අයටයි. විදුලි බල ජාලවලින් ඈත්ව දුර බැහැර ප‍්‍රදේශවලට මෙය අතිශයින් ප‍්‍රයෝජනවත් නෙවා. ඒ අනුව ආරම්භයක් හැටියට ඉන්දියාවේ හා අපි‍්‍රකාවේ අන්ත දිළිඳු ජනතාව 1000කට මේ පහන් නොමිලයේ ලබා දීමට එම නිෂ්පාදන ආයනතය බලාපොරොත්තු වෙනවා.

 

ගුරුත්වාලෝකය යන අරුත් ඇති ග්රැවිටිලයිට් (GravityLight) නම් මෙම පහන දල්විය හැක්කේ වැලි, ගල් බොරලූ ආදී වැඩි බරින් යුත් පාෂාණ ඇතුළත් මල්ලක් එල්ලා තැබීමෙනුයි.

 

ලන්ඩනයේ සිටින මේ ගුරුත්ව පහනේ නිර්මාතෘන් වන මාටින් රිඩිෆෝඞ් දෙදෙනා වසර හතරක් මෙය නිම කිරීමෙහි වෙහෙසුණා.

හිරු බැස ගිය පසු ආලෝකය සඳහා භූමිතෙල්, ජීව වායුව වැනි ඉන්ධන යොදා ගන්නා අයට මේ ක‍්‍රමය ලොකු පහසුවක් වේවි. ලාම්පුතෙල් කුප්පි පෙරළී ගිනි ගැනීමේ අවදානමක් හෝ සෞඛ්‍යයට අහිතකර තත්වයක් මෙවැනි ගුරුත්ව පහනකින් ඇති වන්නේ නැහැ. එසේ ම සූර්යකෝෂ මෙන් ම පරිසරයට හානියක් නැතිව භාවිත කළ හැකි විදුලි බලශක්තියක ලෙස මෙය හැඳින්විය හැකියි.

ලෝකයට හඳුන්වා දුන් මුල්ම අතේ ගෙන යා හැකි පරිගණකය වූ සයිඔන් (Psion) අත් පරිගණක සඳහා ආරක්ෂක ආවරණය නිපදවූයේත් මේ ආයතනයයි.

 

වැලි මල්ලක් තත්පර තුනක් එල්ලා තැබීමෙන් පැය භාගයක් තිස්සේ LED බල්බයක් දැල්විය හැකියි.

 

මේ ගුරුත්ව පහන් 1000ක ඉන්දියාවේ සහ අපි‍්‍රකාවේ දිළිඳු ජනයා අතරේ බෙදා දීමට නියමිතයි. මේ සමග ඇත්තේ ඒ පහන සහ වැලි නොපිරවූ මල්ලක්.

 

ගුරුත්ව පහනකින් ආලෝකය විහිදෙන අන්දම.

ලෝක බැංකුව කියන විදියට දුම් ආඝ‍්‍රාණයෙන් ලොව පුරා පීඩා විඳින කාන්තාවන් හා ළමයින්ගේ ගණන මිලියන 780කට වැඩියි. එහි තරම දිනපතා එක් අයකු සිගරැට් පැකට්ටු දෙකක් උරනවා හා සමානයි. ඒ නිසයි, සංවර්ධනය වෙමනි පවතින රටවල වැඩිහිටි කාන්තාවන් අතරින් සියයට 60ක් පෙණහලූ පිළකාවලින් පෙළෙන්නේ. ඒ අය දුම්බොන අය නෙවෙයි.

එසේ ම මේ දුම් නිසා ඇස්වල ආසාදනයන් හා තිමිරය වැනි රෝග තත්වයන් නිසා වගේ ම පිළිස්සීම් නිසාත් විශාල පිරිසක් පීඩා විඳිනවා. ඉන්දියාවේ විතරක් වසරකට මිලියන 2.5කට වැඩි පිරිසක් කුප්පි ලාම්පු පෙරළීම හේතුවෙන් දරුණු ලෙස පිළිස්සීමට ලක් වෙනවා.

ඒ වගේ ම භූමිතෙල් භාවිතය දරන්නට බැරි තරම් වියදම් අධික ක‍්‍රමයක් වී තියෙනව. ඒ සඳහා ගෙදරදොර වියදමෙන් සියයට 10ත් 20ත් අතර ප‍්‍රමාණයක් වැය වෙනවා.

 

මේ නව විදුලිය උපකරණයේ නිර්මාපකයන් පිරිස: (වමේ සිට දකුණට) පැට්රික් හන්ට්, මාටින් රිඩිෆෝඞ්, මාරියෝ සිකුවේරා හා ජිම් රීව්ස්. ඔවුන් කියන්නේ තාක්ෂණයේ වේගවත් දියුණුව නිසා අඩු බලයෙන් කි‍්‍රයා කරන උපකරණ රැසක් නිපදවීමට හැකි වී ඇති බවයි.

 

මේ උපකරණයෙන් පුළුවන් වෙනත් කුඩා බල්බයක් වුනත් දල්වන්න, ගුවන්විදුලියක් කි‍්‍රයාත්මක කිරීමට යොදා ගන්න, ඒ වගේ ම කුඩා බැටරි ආරෝපණය කරන්න.