Saturday, March 31, 2012

චිත‍්‍රපට අධ්‍යක්ෂ ජේම්ස් කැමරන්ගෙන් ලෝක වාර්තාවක්! මරියානා අගාධයට තනිවම ගිය ප‍්‍රථම මිනිසා!

මිනිස්සු 500කට වැඩි ගණනක් උඩු ගුවනට මේ වන විට ගිහින් තියෙනවා. ඒ අතරින් 12 දෙනකු සඳ මත ඇවිදලත් තියෙනවා. ඒත් මුහුදු යට ගැඹුරු ම තැනට ගිහිල්ලා තියෙන්නේ තුන් දෙනෙක් විතරයි. 1960 ජනවාරි 23 වැනිදා දෙදෙනෙක් මුල්වරට ගැඹුරු ම තැන වූ මරියානා අගාධයට ගියා. මුලින් ම ඒ අඳුරු තැන පියවි ඇසින් දැක ගත්තේ ප‍්‍රංශ ජාතික ගවේෂකයකු වූ යාකුස් පිකාඞ් හා නාවික ලූතිනන් ඩොන් වොල්ෂ් යන දෙදෙනායි. ඔවුන් එහි ගියේ ඒ ගමන සඳහා තැනූ විශේෂ කුමුදුවකින්. එය හැඳින් වුණේ ටී‍්‍රස්ට් බැතිස්කැප් කියලයි. ඒ මීට අවුරුදු 52කට ඉස්සර.

Friday, March 30, 2012

ඇන්ටාර්ක්ටිකාවේ මුහුද යටින් සුදු කකුළු විශේෂයක්!

ඇන්ටාර්ක්ටිකාව අසල මුහුද යට ඇති යමහල් සිදුරු ඇසුරු කොට වෙසෙන නව කකුළු විශේෂයක් ගැන වාර්තාවක්, මේ. මේ සත්ව විශේෂය විද්‍යාඥයන් විසින් නිරීක්ෂණය කර කැමරාවට නගා තියෙන්නේ පළමු වන වතාවටයි. මුලූමනින් ම සුදු පැහැති සිරුරක් ඇති මේ කකුළු විශේෂය ජීවත් වන්නේ එක්තරා බැක්ටීරියා විශේෂයක් ආහාරයට ගෙනයි. ඒ බැක්ටීරියාව වැඩෙන්නේ එහි සාගර පත්ලෙහි ඇති ද්‍රවතාප hydrothermal සිදුරුවලින් නිකුත් වෙන ඛනිජ ද්‍රව්‍යවලින්.

Thursday, March 29, 2012

වසර මිලියන 60කට පෙර විසූ ලොව ලොකුම සර්ප දැවැන්තයා වූ අති බිහිසුණු ටයිටනබෝ

මේ මිහි මත විසූ ලොව ලොකුම සර්ප දැවැන්තයා වූ අති බිහිසුණු ටයිටනබෝ දැන් දැක ගන්න පුළුවන්. ඌ තමයි ඩයිනොසෝරයන් ගෙන් පස්සෙ ලෝකය හෙල්ලූ දැවැන්තයන්. පසුගිය දා ඇමරිකාවේ ස්මිත්සෝනියන් ස්වභාව විද්‍යා කෞතුකාගාරයෙහි මේ සතකුගේ අනුරුවක් අලූතින් නිර්මාණය කළා.

ඌ අඩි 48ක් දිග, රාත්තල් 2,500 බර විලෝපික උරගයෙක්. ඔබ දන්නවා නේ විලෝපිකයන් කියන්නේ ආහාරය සඳහා සතුන් ගොදුරු ගන්නා මාංශ භක්ෂකයන්ට බව. වසර මිලියන 60කට ඉහත ලොව දෙවනත් කරමින් ජීවත් වූ මේ බිහිසුණු පිඹුරු දැවන්තයා ප‍්‍රති නිර්මාණය කරන්න ස්මිත්සෝනින් ආයතනයේ විශේෂඥයන් සමත් වුණා.

 
ස්මිත්සෝනියන් විද්‍යාඥයන් වීඩියෝ චිත‍්‍රපටයක් සඳහා ප‍්‍රති නිර්මාණය කළ ටයිටනබෝගේ දිග අඩි 48ක් හා බරින් රාත්තල් 2500ක්.

Wednesday, March 28, 2012

මැඩගස්කරයේ අබිරහස් බිළාලයා - ‘පූසා’ සොයා ගිය ගමනක් !


මේ ඉන්නේ මැඩගස්කරයේ ලොකුම විලෝපිකයායි. එරට මාංශභක්ෂක සතුන් අතර ප‍්‍රමුඛයා වන මේ ‘මැඩගස්කරයේ කැලේ රජා’ට ආහාරයට ගැනීමේදී විශේෂයක් නැහැ, පණ තියෙන ඕනැ සතෙක් ඔට්ටුයි. නැෂනල් ජ්‍යොග‍්‍රෆික් සංගමයේ නවක සත්ව ගවේෂකයකු වූ ජීව විද්‍යාඥ ලූක් ඩොලර් තමයි, මේ විස්තර ඔබ වෙත ගෙන එන්නෙ.

Tuesday, March 27, 2012

‘මැඩගස්කරය’ කාටූන් චිත‍්‍රපටයේ සිදු වූ දෙය වසර මිලියන 60කට පෙර ඒ විදියට ම සිදු වුණා!

මැඩගස්කරයේ දී හමුවන අමුතු සතුන් පැවත එන්නේ මීට වසර මිලියන 60කට එපිට දී මුහුද හරහා ආ ආදී මුතුන්මිත්තන් ගෙන්. හරියට ම ‘මැඩගස්කරය’ නම් කාටූන් (සැකිලි රූ) චිත‍්‍රපටයේ දී සිදුවුණා වගේමයි.

විද්‍යාඥයන් විසින් භෞමික සතුන් විසිරී ඇති ආකාරය ගැනත් පොළොවේ භෞතික පිහිටීම ගැනත් මුහුදේ වායුගෝලීය තත්වයන් ගැනත් පවත්නා සුළං ප‍්‍රවාහ ඔස්සේ අපි‍්‍රකාවේ සිට පහුරු මතින් පා වී ආ අයුරු දැක්වෙන ආකෘතියක් සකස් කර තියෙනවා.

මේ කටයුත්තට දායක වූ ඕස්ටේ‍්‍රලියාවේ ක්වීන්ස්ලන්ත විශ්ව විද්‍යාලයේ ආචාර්ය කැරන් සැමන්ඞ්ස් හා සගයන් කියන්නේ මේ ජලප‍්‍රවාහ අඩු වූ විට එසේ පා වී ආ පහුරුකරුවන් ද අඩු වූ බවයි.

 
මැඩගස්කරය චිත‍්‍රපටයෙන්: ඒ චිත‍්‍රපටයේ දී සීබ‍්‍රා (මාර්ටි), සිංහයා (ඇලෙක්ස්), හිපෝ (ග්ලෝරියා) හා ජිරාෆ් (මෙල්මැන්) ආදීන් ඒ දූපතේ වෙරළට මුහුදෙන් ගසා ගෙන ආ අයයි.

Monday, March 26, 2012

තිඹිරියාගම කවියාගේ අලූත් කවි පොතක් එළි දකියි

වත්මන් පරපුරේ තරුණ ලේඛකයන් අතරින් තවදත් අපේ සිත් ගත් තිඹිරියාගම බණ්ඩාර සහෘදයාගේ අලූත් පොත් තුනක් පසුගිය දා විශේෂ දොරට වැඞීමකදී පිටවුණා. ඔහු විසින් ඉදිරිපත් කරන ලද පොත් තුනක් ජනගත කිරීමක් එදා සිදු වුණත් අද කතා කරන්න යන්නේ ඔහුගේ අලූත් ම කවි නිර්මාණ එකතුව ‘ගිනි සිසිල’ ගැනයි. එහි විවිධ මාතෘකා යටතේ පළ වූ කවි අතර අප හදවත් සසල කළ කවි ගණනාවක් ම තිබුණා. ඒ අතර තිබූ එක් පුංචි කවි පෙළක් ‘මල් කැකුළු’ තුළින් ඔබේ වින්දනය සඳහා ඉදිරිපත් කරන්නට අප කල්පනා කළා. කවියා කොතරම් සියුම් ලෙස සිය කවීත්වයෙන් අපේ හද ස්පර්ශ කරනවාද කියා හඳුනා ගන්න ඉතා හොඳ නිර්මාණයක් හැටියටයි, අප මෙය දකින්නෙ.

ඔබේ දත් හොඳට මැදිලාදැයි හරියටම කියන ‘ස්මාට්ගයිඞ්’ එකක් ඇති අලූත්ම තාලේ දත් බුරුසුවක්!

 
 ලස්සන සිනාවක් තහවුරු කරන නව තාක්ෂණික නිපැයුම - New Oral-B PC Triumph 5000 with SmartGuide

අප සාමාන්‍යයෙන් දත් මදින බුරුසුව වෙනුවට ඉලෙක්ට්‍රොනික දත් බුරුසුව ඇවිත් දැන් වසර අටක් විතර වෙනවා. දැන් ඊටත් එහා ගිය නිපැයුමක් ඇවිත්. නවීන තාක්ෂණයේ අග‍්‍ර ඵලයක් සෙල එය හඳුන්වන්න පුළුවන්.

මේ නව විදුලි දත් බුරුසුව හඳුන්වා ඇත්තේ ‘බ්‍රොන් ඕරල් බී ට‍්‍රයම්ප් 5000’ කියායි. හැමදෙයක් ම සිදු වන්නේ තාක්ෂණයෙන්.

Sunday, March 25, 2012

ගිනි කන්දක් වැනි සුඛෝපභෝගී හෝටලයක්!

බැලූ බැල්මට නම් මේක යමහලක් නැත්නම් ගිනි කන්දක් වගෙයි. ඒත් මේක සුඛෝපභෝගී හෝටලයක්. ඔබ හිතන්නේ මේක කොහේ තියෙන හෝටලයක් කියල ද?

Saturday, March 24, 2012

සිනමා තිරය මත මිනිස් ජීවිතය සිතුවම් කළ සත්‍යජිත් රායි : ආසියානු සිනමාව 2

ශ්‍රේෂ්ඨ ජපන් චිත‍්‍රපට අධ්‍යක්ෂ අකිර කුරෝසව (ආසියානු සිනමාව-1 බලන්න) ඉන්දියාවේ සත්‍යජිත් රායිගේ චිත‍්‍රපට ගැන කියා ඇත්තේ ඒවා නුදුටු අයකු ”ඉරයි හඳයි නුදුටු ලොවක ජීවත්වන්නකු වගෙයි” කියායි.

සත්‍යජිත් රායි Satyajit Ray ඉන්දියානු චිත‍්‍රපට අධ්‍යක්ෂවරයකු වශයෙන් හැඳින්වුවද බෙංගාලි බසින් චිත‍්‍රපට තැනු අයෙක්. 20 වැනි සියවසේ බිහිවූ ශ්‍රේෂ්ඨ චිත‍්‍රපට අධ්‍යක්ෂවරුන් අතළොස්ස අතරට වැටෙන ඔහුගේ මුල්ම චිත‍්‍රපටය ‘පාතේර් පංචාලි’ (1955) යි. ඔහුගේ එම චිත‍්‍රපටය කෑන්ස් චිත‍්‍රපට උළෙලේ ‘හොඳම මානුෂීය වාර්තා චිත‍්‍රපටය’ යන සම්මානය ඇතුළු අන්තර්ජාතික චිත‍්‍රපට උළෙලවල දී අන්තර්ජාතික සම්මාන 11ක් දිනා ගත්තා.

Friday, March 23, 2012

ඔබ කලහකාරි අයකු කරන 'මාගරීන්'! අලූත් ම පර්යේෂණයකින්!

මාගරින් ඇත්තෙන් ම ඔබ තුළ කෝපයක් ප‍්‍රචණ්ඩකාරී ගතියක් ඇති කරනවා. ඒවා පාසල් ළමුන්ට කිසිසේත් දිය යුතු දෙයක් නෙවෙයි. අලූත්ම පර්යේෂණ අධ්‍යයනයකින් හෙළි වී තියෙනවා.

එහි ඇති ‘ට‍්‍රාන්ස් මේද අම්ල’ 'trans fatty acids' නිසයි එහෙම වෙන්නේ. ඒවා විශාල ප‍්‍රමාණයක් මාගරින්වල අඩංගු වෙනවා. මාගරින්වල විතරක් නෙවෙයි, හුඟාක් ක්ෂණික කෑම (කෙටි කෑම) ආදියෙහිත් මිනිසා තුළ කලහකාරී හැඟීම් මතු කරන, සිත් කුපිත කරවන මේ රසායනික සංයෝග බහුලව ඇති බවයි, හෙළි වී තියෙන්නේ.

පර්යේෂකයන් මේ අධ්‍යයනය සඳහා 945 දෙනකු යොදා ගෙන තියෙනවා. ඒ අයට මාගරින් සමග විවිධ ආහාර වර්ග කෑමට දීලා අඛණ්ඩ විමසුමකට ලක් කරලා තියෙනවා. මේ රසායනිකය විශාල ප‍්‍රමාණයෙන් ආහාරයට ගත් නිතරම ප‍්‍රචණ්ඩ ලක්ෂණ පෙන්නුම් කරලා තියෙනවා.

අලූත්ම අධ්‍යයනයකින් හෙළි වී ඇත්තේ මාගරින්වල බහුලව ඇති රසායනිකය මිනිස් සිත කුපිත කරවන බවයි. පර්යේෂකයන් කියන්නේ ඒ නිසා විශේෂයෙන් ම පාසල් ළමුනට නොදිය යුතු බවයි.

Thursday, March 22, 2012

දකුණේ වන සතුන් බලන්න හොඳම තැන යාල ගැන දැන ගන්න! අපේ ජාතික වනෝද්‍යාන!

මේ දවස්වල ශී‍්‍ර ලංකාවේ රුහුණු (යාල) ජාතික වනෝද්‍යානයට දෙස් විදෙස් සංචාරකයන් ඇදෙන කාලෙ. දකුණේ වන සතුන් බලන්න හොඳම තැන යාල බව අමුතුවෙන් කියන්න දෙයක් නෑ.

අපේ පැරණිම වන රජදහන යාල ජාතික වනෝද්‍යානයයි. එහි වෙසෙන විවිධ සත්ව වර්ග ගැන සොයා බලන කොට එය ගණනින් 215ක් හැටියටයි දැක්වෙන්නෙ.

Wednesday, March 21, 2012

සෙනසුරුගේ සඳක වායුගෝලයේ ඔක්සිජන්! නාසා ආයතනයේ කැසිනි යානය කළ හෙළිදරව්වක්!

සෙනසුරු ග‍්‍රහයාගේ චන්ද්‍රයකු වන ඩියෝන් (Dione) හී ඔක්සිජන් සහිත වායුගෝලයක් ඇති බව සොයා ගෙන තියෙනවා. මේ සොයා ගැනීම්වලින් ගම්‍ය වන්නේ බ‍්‍රහස්පතී හා සෙනසුරු ග‍්‍රහයන් පිරිවරා ඇති චන්ද්‍රයන් තුළ කිසියම් ආකාරයක ජීවීයක් ද තිබිය හැකි බවයි.

මේ බව හෙළි වූයේ 2010 අපේ‍්‍රල් 7 වන දා නාසා ආයතනය විසින් යවන ලද කැසිනි අභ්‍යවකාශ යානය ඩියෝන් චන්ද්‍රයාගේ අසලින් ගමන් කරමින් කළ විමසුමකට අනුව එහි වායුගෝලයේ ඔක්සිජන් ඇති බව සොයා ගැනීමෙන් පසුවයි. ඒත් පර්යේෂකයන් කියන්නේ අපේ වායුගෝලයේ මෙන් නොව එහි ඔක්සිජන් ඇත්තේ ඉතාමත් තුනී මට්ටමකින් බවයි. එය ඇත්තේ දළ වශයෙන් අපේ වායුගෝලයේ කි.මී. 483ක් පමණ ඉහළ ඔක්සිජන් පැතිර ඇති ආකාරයක ඉතා සුළු ප‍්‍රතිශතයක් හැටියටයි.

Tuesday, March 20, 2012

ටයිටැනික් නැව මුහුදුබත් කළේ යෝධ මුහුදු රැල්ලක්ද? වසර 1400කට වරක් වන සිදු වීමක් ද?

මීට හරියට ම අවුරුදු සීයකට ඉස්සර, සුප‍්‍රකට ටයිටැනික් නැව කැඞී බිඳී මිනිස් ජීවිත 1500ක් පමණ  මුහුදට බිලි වුණු කතාව පසුගිය කාලේ ඔබ ජේම්ස් කැමරූන්ගේ ‘ටයිටැනික්’ චිත‍්‍රපටයෙනුත් දුටුවා ඔබට මතක ඇති. තවමත් ලෝකයාට අමතක කරන්න බැරි ඒ අනුවේදනීය සිදු වීමට හේතුව මුහුදේ පාවී ආ යෝධ අයිස් කන්දක් හා ගැටීමයි. එය සිදුවුණේ 1912 අපේ‍්‍රල් 14 වැනිදා.

එදා හිම කන්ද ටයිටැනික් ඉදිරියට ආවේ හඳේ බලපෑම නිසාද? මෙය ජීවිත කාලයකට වරක් සිදුවන සුනාමියක් බඳු යෝධ මුහුදු රැල්ලක් ඇති වීම නිසා සිදු වූවක්ද? 1912 ජනවාරි 12 වැනිදා සිදු වූ මේ උදම් රළ නිසා ගී‍්‍රන්ලන්තයේ හිම කඳු සහිත ප‍්‍රදේශයෙන් කැඞී මුහුදට එකතු වූ යෝධ හිම කුට්ටි ගණනාවක් අත්ලාන්තික් සාගරය හරහා පා වී ආවා. ඒවාට මේ ගමනට මාස තුනක් ගත වුණා.

එංගලන්තයේ රූපවාහිනී නාළිකාවක විකාශය වූ ටයිටැනික් කතා මාලාවක් හඳුන්වා දීමේ දී මෙම හෙළිදරව්ව කළ පීටර් මැක්ඩොනල්ඞ්.

Monday, March 19, 2012

ජේම්ස් කැමරන් සාගරයේ ගැඹුරුම තැනට කිමිදෙන්නට ලෑස්තියි! ඒ සඳහා විශේෂ කිමිදුම් යානයක්!

ජේම්ස් කැමරන් ගැන ඔබ අහලා ඇතුවා නිසැකයි. ටර්මිනේටර්, ටයිටැනික්, ඇබිස්, අවතාර් ආදී චිත‍්‍රපට අධ්‍යක්ෂණය කළ ඔහු සුවිශේෂ හැකියාවන් රැසක් ඇති අයෙක්. ඔහු ලේඛකයෙක්. තිර රචකයෙක්, නව නිපැයුම්කරුවෙක්, කිමිදුම්කරුවෙක්, ගවේෂකයෙක්, අඩක් විද්‍යාඥයෙක් - අඩක් කලාකරුවෙක් කියලයි විචාරකයන් ඔහුව හඳුන්වන්නෙ.

කැනඩාවේ ඉපදිලා දැනට නවසීලන්තයෙත් ඇමරිකාවේ කැලිෆෝනියාවෙත් ස්ථිර පදිංචිය ඇති ඔහු දැන් සූදානම් වෙනවා මහ පොළොවේ ගැඹුරුම තැනට කිමි දෙන්නට. ඒ පැසිපික් සාගරයේ මරියානා අගාධයයි. එය 11000 Km ගැඹුරුයි. උසම කන්ද වූ හිමාලයටත් වඩා දිගින් වැඩියි. ඔහු මේ ගමන යන්නේ තනිවමයි. 1960න් පසු මේ වන තෙක් කිසිවෙක් මේ කිමිදුම කර නැහැ.

Sunday, March 18, 2012

දරුවා අඬන හේතුව ‘ටක්’ ගාලා කියා දෙන ‘ස්මාට්’ සූට්! අම්මලා තාත්තලාට සුබ ආරංචියක්!

දරුවාගේ තත්වය ඔබට කියා දෙන ‘ජෛව සංවේදක’ ඇඳුමක් දැන් නිපදවලා තියෙනවා. ඒක නම් කර තියෙන්නේ ‘එක්ස්මෝබේබි’ ඇඳුම කියලයි. ඒ ඇඳුමට, උණකටුවක්, හදගැස්ම (හෘද ස්පන්දනය) දක්වන උපකරණයක්, චලන සංවේදක උපකරණයක් ඇතුළත්. මේ උපකරණවලින් දරුවාගේ තත්වය, මොහොතින් මොහොත දන්වන්න පුළුවන්. බබා නිදියනවා වෙනුවට එහාට මෙහාට පෙරළෙනවාද යන්න පවා දෙමාපියන්ට දන්වනවා, ඊමේල් මගින් හෝ කෙටි පණිවිඩ මගින්.

එක්ස්මෝබේබි ඇඳුම තුළ සංවේදක තැන්පත් කර තියෙනව, මාපියන්ට බබාගේ තත්වය ගැන කිව හැකි.

ශ්‍රී ලාංකීය ක්‍රිකට් ලෝලීන්ගේ අමරණීය රැය

ශ්‍රී ලාංකීය ක්‍රිකට් ලෝලීන්ට අමරණීය රැයක් වූ  1996 මාර්තු 17  දින (අවුරුදු 16කට පෙර) පකිස්තානයේ ලාහෝර්හි ගඩාෆි ක්‍රීඩාංගනයේදී  ක්‍රිකට් පිටියේ ලිලිපුට්ටන් වූ ශ්‍රී ලංකාව ක්‍රිකට් පිටියේ යෝධයන්වු ඕස්ට්‍රේලියානු කණ්ඩායම පරාජය කරමින් 6 වැනි ලෝක කුසලානය (විල්ස් ලෝක කුසලානය නමින් ද හැදින්විය)  තමන් සතු කර ගත් අර්ජුන රණතුංග ප්‍රමුඛ ශ්‍රී ලංකා කණ්ඩායම ශ්‍රී ලංකා නාමය ලෝක ක්‍රිකට් ඉතිහාස පොතේ රන් අකුරින් ලිව්වේය.

Saturday, March 17, 2012

නිවසේ තනිකම මකා ගන්නට අන්තර් ජාලයට පිවිසුණු තරුණ බ්ලොග්කරුවා අද කෝටිපතියෙක්!

මේ වාසානවන්ත බ්ලොග් ලියන්නකුගේ කතාවක්. ස්කොට්ලන්තයේ නිදන කාමරයට වෙලා තනිකම නැති කර ගන්න පටන් ගත්තු බ්ලොග් එකක් නිසා අද ඔහු කෝටිපතියකු බවට පත් වෙලා. ඇමරිකාවේ අංක එකේ මාධ්‍ය ආයතනය වූ CNN දැන් ඔහුගේ බ්ලොග් එක ඩොලර් කෝටි විස්සකට මිල දී ගන්න යනවා. ඔහු මේක පටන් අරන් තියෙන්නෙ ඇඳෙන් නැඟිටින්නෙ නැතුව කරන්න පුළුවන් දෙයක් හැටියටයි.

පීට් කෑෂ්මෝ Pete Cashmore දැන් 26 හැවිරිදි තරුණයෙක්. ඔහුගේ මාෂබල් කොම් Mashable.com බ්ලොග් අඩවිය පටන් ගත්තෙ 2005 දී ස්කොට්ලන්තයේ ඇබර්ඞීන්ෂයර්හි බැංකරි නම් කුඩා නගරයේ සිටයි. එතකොට එයාගෙ වයස අවුරුදු 19යි. පාඩම් කරල කම්මැලි හිතුනාම එයා මේ බ්ලොගය ලියන්න පටන් ගත්තා.

අවුරුදු හතකට පස්සේ ඔහු පටන් ගත් ඒ තාක්ෂණික පුවත් සපයන බ්ලොග් අඩවිය සඳහා ඇමරිකාවේ නිව්යෝක් නගරයේ සිය ප‍්‍රධාන කාර්යාලය පවත්වා ගෙන යනවා.

ඔහුගේ නමෙත් විශේෂත්වයක් තියෙනවා. ගමෙත් විශේෂත්වයක් තියෙනවා. නම ‘කෑෂ්මෝ’ කියන්නේ ‘තවත් මුදල්’ කියන තේරුමයි. නමට හරියන්න ඔහු ලෝකයේ ලොකුම පොහොසතෙක් වෙලා. ඔහුගේ ගම, ‘බැංකරි’ කියන්නේ ‘ආශිර්වාද ලත් බිම’ කියන තේරුමයි. එක්සත් රාජධානියේ ඈත කොණක පිහිටි බැංකරි කියන කුඩා නගරය අද ඔහු නිසා ‘අසිරිමත් තැනක්’ වෙලා ඉවරයි.

පීට් කෑෂ්මෝ තවත් මුදල් ලබා මිලියන පතියෙක් වේවි, ඔහුගේ බ්ලොග් අඩවිය විකුණුවාම. මේ ඉන්නේ ඔහු වාසනාවන්ත පෙම්වතිය ලියා බෙටනියි.

ලෝක සිනමා ලෝලයන්ගේ ඇස් ආසියාවට ඇද ගත් සිනමාකරුවන් තිදෙනා : ආසියානු සිනමාව 1

ලෝක සිනමාව බිහිවී වසර 50කට පසුව එළඹි 1950 දශකය ආසියාවේ ජයග‍්‍රාහී දශකය වුණා. ලෝක සිනමාවට පිවිසෙන්නට ආසියානු චිත‍්‍රපටවලට වරම් ලැබුණේ ඒ දශකය තුළයි. ආසියාවට එම කීර්තිය මුල් වරට අත් කර දෙන්නට ආසියානු චිත‍්‍රපට අධ්‍යක්ෂවරුන් තිදෙනෙකු සමත් වුණා.

ඒ අවස්ථාව මුලින්ම උදා කර ගත්තේ ජපානයේ අකිර කුරෝසව (Akira Kurosawa) යි. ඒ ඔහුගේ ‘රශෝමොන්’(Rashomon -1951) චිත‍්‍රපටයෙන්. දෙවැන්නා ඉන්දියාවේ සත්‍යජිත් රායි. ඒ ඔහුගේ ‘පාතේර් පංචාලි’ (Pather Panchali - 1955) චිත‍්‍රපටයෙන්. ඒ දෙදෙනාම අද ජීවතුන් අතර නැහැ.

Friday, March 16, 2012

සක්වළ ඇති අලූත් ග‍්‍රහයන් ගණන 2,321ක්! පොළොවට සමාන ඒවාත් තියෙනවා! කෙප්ලර් අභ්‍යවකාශ දුරේක්ෂයෙන්!

අපේ සෞර ග‍්‍රහ මණ්ඩලයෙන් පිටත අලූත් ග‍්‍රහයන් සේ සැලකිය හැකි තවත් ග‍්‍රහ වස්තූන් දහසකට වඩා අලූතින් සොයා ගෙන ඇතැයි නාසා ආයතනයේ කෙප්ලර් අභ්‍යවකාශ දුරේක්ෂයෙන් ලැබුණු දත්ත ඇසුරෙන් කළ නව අධ්‍යයනයකින් හෙළි වී තියෙනවා.

මේ අධ්‍යයනයට පාදක වී ඇත්තේ 2009 මැයි මාසයේ සිට 2010 සැප්තැම්බර් දක්වා කාලය තුළ කෙප්ලර් අභ්‍යවකාශ දුරේක්ෂය මගින් රැස් කරන ලද දත්තයන්.

ඒ තොරතුරු අනුව ග‍්‍රහයන් විය හැකි වස්තූන් 1,091ක් අලූතින් හඳුනා ගෙන තියෙනවා. පසුගිය පෙබරවාරියේ ප‍්‍රකාශයට පත් ග‍්‍රහයන් විය හැකි වස්තූන් ගණන 1,235ක්. ඒ අනුව දැන් සම්පූර්ණ ගණන 2,321ක් වෙනවා. ”අපට ස්ථිර සාධක තියෙනවා, ඒවායින් සියයට අනූවක්වත් සැබැවින් ග‍්‍රහ ලෝක විය හැකි බවට.” මෙසේ කියන්නේ, කෙප්ලර් ගවේෂණ අධ්‍යයන කණ්ඩායමේ සාමාජික රෝනල්ඞ් ගිලිලන්ඞ් නම් ඇමරිකාවේ පෙන්සිල්වේනියා විශ්ව විද්‍යාලයේ තාරකා විද්‍යාඥයායි.

Thursday, March 15, 2012

විකූනා උපදින තෙක් බලා හිඳින සංරක්ෂකයන් පිරිසක්

විකූනා vicuña කියන්නේ ඔටු පවුලට අයත් සතෙක්. ලාමා විකූනා යන සත්ව විද්‍යාත්මකව හැඳින්වෙන මේ සතා දක්නට ලැබෙන්නේ ඇන්ඞීස් සානුවේයි. ඌට පැයට කිලෝමීටර 50ක තරම් වේගයකින් දුවන්න පුළුවන්. ඇස් පෙනීම තියුණු වුනත් කන් ඇසීම එතරම්ම හොඳ නැහැ. ඉව දැනීමත් ඉතා දුර්වලයි. මස් හා ලොම් ලබා ගැනීමට දඩයම් කිරීම නිසා වඳ වී යාමේ තර්ජනයට ලක්වෙලා. ආරක්ෂිත සතකු ලෙස නම් කොට ඇති මේ සතුන් මුළු ආජෙන්ටිනාවේම ඇත්තේ තුන් දහසක් පමණක් බවත් හෙළි වී තියෙනවා. ඔවුන් සඳහා සංරක්ෂණ වැඩ පිළිවෙළ රැසක් දැන් දියත් කර තියෙනවා. ලාමා, ඇල්පකා, ගුවානෝකෝ යන සතුන් විකූනාගේ ළඟ නෑයන්.

Wednesday, March 14, 2012

මකුළුවකු ගොදුරක් වෙත එල්ලයකට නිවැරදිව පනින්නේ කොහොමද? විශේෂ හැකියාවක්!

අපි දන්නවා, කෘමීන්ට විශේෂ හැකියාවක් තියෙනවා, ඇස්වල යම්යම් වෙනස්කම් කරල බලන්න. තමන් රොන් ගන්න මලක් හඳුනා ගන්න, එහෙමත් නැත්නම් ගොදුරක් හඳුනාගන්න ඇස්වල නාභිය වෙනස් කිරීමෙන් ඔවුන්ට පුළුවන්. අනෙක් සමහර සතුන්ටත් හිස එහා මෙහා හැරවීමෙන් හෝ සිටි තැන වෙනස් කිරීමෙන් හෝ අවශ්‍ය දේ කෙරෙහි ඇස යොමු කර ගන්න පුළුවන්. මෙය හැඳින්වෙන්නේ චලන අසම්පාතය (motion parallex) කියලයි. මිනිසාටත් මේ හැකියාව තියෙනවා. මෙයට වඩා වෙනස් හැකියාවක් පනින මකුළුවාට තියෙන බව ජපන් පර්යේෂකයන් පිරිසක් සොයා ගෙන තියෙනවා.

Tuesday, March 13, 2012

හිමාල අඩවියෙන් හමුවුණු යෝධ සමනලයෙක් !

මේ සමනලයෙක් (butterfly) නෙවෙයි, රෑ සමනලයෙක්. හරියටම කියනවා නම් ශලබයෙක් (moth). කොහොමද මේ වගේ එකෙක් ඔබේ ඇඳුම් අල්මාරියෙ ඉන්නව දැක්කොත්. ඔබ යටිගිරියෙන් කෑගසාවි.

මේ තමයි, ලෝකයේ ඉන්නා ලොකු ම ශලබයා. ඇට්ටාකුස් (Attacus) හෙවත් ඇට්ලස් ශලබයා. ඊසාන දිග ඉන්දියාවෙ මහපාරක් අද්දරදි හමුවුණේ.

Monday, March 12, 2012

වේග සීමා නෑ! IBM විද්‍යාඥයන් ගෙන් ‘ක්වන්ටම් පරිගණකය’! දැනට ඇති සුපිරිම පරිගණකවලට වඩා වේගවත්!

මේ මිහිපිට දැනට තනා ඇති සුපිරිම පරිගණකවලට වඩා වේගවත් පරිගණකය ලෙස සැලකෙන ‘ක්වන්ටම් පරිගණකය’ තැනීමේ සිහිනය සැබෑ කර ගන්න IBM ආයතනයේ විද්‍යාඥයන් දැන් සූදානම්.

ඔවුන් දැනටමත් ඒ සඳහා අවශ්‍ය උපාංග නිර්මාණය කරල ඉවරයි. ඔවුන්ගේ ඊළඟ පියවර පරිගණක පද්ධති නිර්මාණය කිරීමයි.

ඒ අනුව තැනෙන ‘ක්වන්ටම් පරිගණකය’ට මිලියන ගණනක් ගණනය කිරීම් එසැණෙකින් කළ හැකියි. මිහිපිට ඇති  ඕනෑම පරිගණක කේතයක් එසැණ විකේතනය කළ හැකියි.

මිලියන ගණනක් ගණනය කිරීම් එසැණ කළ හැකි සිලිකන් චිපය - මෙහි අධි-තාක්ෂණ ‘ක්විබිට්ස්’ තුනක් රැඳවිය හැකියි.

Sunday, March 11, 2012

මානව පරිණාම කතාව, පැරණිම අම්මා හා ශී‍්‍ර ලංකාවේ ආදී මානවයා : පරිණාමයේ කතාව 4


ක්ෂීරපායීන්ගේ පරිණාමය
ක්ෂීරපායීන් හෙවත් කිරී බී වැඩෙන සතුන් අයත් ගණය හැඳින්වෙන්නේ මමාලියා (Mamalia) කියාය. මමාලියාවන් අයත් වන්නේ සිරුරේ උෂ්ණත්වය ස්ථිර ව පවත්වා ගෙන යා හැකි, එනම් අචලතාපී (warm-blooded) ගණයටය. මොවුන් හැඳින්වෙන්නේ ‘පණ පිටින් ඉපදෙන’ සතුන් ලෙස ය. ඒ බිත්තර වශයෙන් මෙලොවට බිහි වී ‘පසුව උපදින’ සතුන්ගෙන් වෙනස් වන නිසාය. මවු කුසෙහි හැදී වැඞී පසුව පණ ඇති බිහි වන මේ සතුන් වැඩෙන්නේ මව්කිරි බී මෙනි. පාද හතරක් ඇති, රෝමවලින් යුත් මේ සතුන් බල්ලන්, සිංහයන්, අශ්වයන්, ගවයන්, සාවුන්, අලිඇතුන්, මීයන් ආදී වශයෙන් විශාල සංඛ්‍යාවක් නිදර්ශන වශයෙන් දැක්විය හැකිය. මිනිසා ද අයත් වන්නේ මේ ගණයටය.

Saturday, March 10, 2012

උතුරු අහසේ විස්මය දනවන දසුන්! දීප්තිමත් ආලෝකධාරා වලට හේතුව කුමක්ද?

පසුගිය පෙබරවාරි 14 වැනිදා නෝර්වේජියානු කඳුවළල්ලට ඉහළින් අහසේ දීප්තිමත් ආලෝකධාරා විහිදීමක් දර්ශනය වුණා. එය අහස්කුස නරඹන්නන් විමතියට පත් විස්මයටත් පත් කළ රමණීය දසුනක් වුණත් ඒවා සූර්යයා ඇති කරන සුපුරුදු උත්තරාලෝක දසුන් නොවේ.

Friday, March 09, 2012

තවත් ග‍්‍රහකයක් පොළොවට ආසන්නයට එනවා! ඒත් අපට අනතුරක් නෑ!

තවත් ග‍්‍රහකයක් (asteroid) පෘථිවියට දෙසට පැමිණෙමින් තිබෙන බව තාරකා විද්‍යාඥයන් විසින් සොයා ගෙන තියෙනවා. දැනට පෘථිවිය වටා කක්ෂයකට පිවිස සිටින මේ ග‍්‍රහකය හඳුන්වා ඇත්තේ 2012DA14 කියායි. අඩි 150ක් (මීටර් 50ක්) පමණ දිග මෙම අප විසින් මෙතෙක් උඩුගුවනට යවන ලද චන්ද්‍රිකාවලට වඩා පහළින් ගමන් කරනු ඇති.

ඇමරිකානු නාසා ආයතනය නිකුත් කළ ගැටීම් අවදානම් වාර්තාවට අනුව මෙය පෘථිවියෙහි හැපෙන්නට ඇති අවදානම බොහෝ සේ අඩුය. ලබන අවුරුද්දේ පෙබරවාරි 15 වැනිදා අපේ පොළොවට සැතැපුම් 17,000ක් ආසන්නව, අපේ පෘථිවි කක්ෂගත චන්ද්‍රිකා පවතින කක්ෂයට පහළින් ගමන් කරනු ඇති.

 
අනතුරක් නෑ: ඇමරිකානු තාරකා විද්‍යාඥ ෆිල් ප්ලේට් කියන්නේ බිය වීමට දෙයක් නැති බවයි.

Thursday, March 08, 2012

ළමා කලම මාපියන් මියගියත් මහ පඬුවකු වනතුරු ඉගෙනීම අත්හළේ නෑ : රැපියෙල් තෙන්නකෝන් ගැන තවත් විස්තර...

රැ. තෙන්නකෝන්ගේ ‘හැවිල්ල’ නම් පැදි ගතෙන් උපුටා පළ කළ ‘කුකුළු හැවිල්ල’ රස විඳි අපේ රසවතුන් ඔහු ගැන තවත් විස්තර අපෙන් විපරම් කළා. ඒ නිසා ඔහුගේ වතගොත සටහන් කර තබන්නට අප කල්පනා කළා. අදට එය කාලෝචිත වන්නේ ඔහු මියගොස් හරියටම වසර 47ක් සපිරෙන නිසාය.

සිංහලයේ වැඩි ම පැදි ගණනක් පබැදූ කිවිඳුන් කවුරුන්දැයි විමසුවොත් ඊට පිළිතුර රැ. තෙන්නකෝන් ය. ඔහුගේ පැදි නදිය ඇරඹුණේ ‘වවුලූව’ ගතෙනි. එම පළමු නිබැඳුමෙන් ම ඔහු මහ කිවිඳකු බව පළ විය. සංවාද ස්වරූපයෙන් රචනා කර ඇති වවුලූවෙන් කියැවුණේ කැවිඩියක හා වවුලකු අතර කතාවකි. උපහාස රසයෙන් අනූන ඒ කාව්‍යය සමාජයේ දුබල තැන්වලට පහර එල්ල කළ කෘතියකි. ‘සක්පුබුදුව’, ‘පඬු ඇඹුල’, ‘දෑ විනය’, ‘මුළුතැන අන්දරය’, ‘රුප්පෙ අන්දරය’, ‘බැතිමත’ හා කුමරතුඟුවන්ගේ දරුවන්ට පිදි ‘පඬුර’ ඇතුළු තවත් පැදි ගත් කිහිපයක් වෙයි. ඔහු ‘සිංහල වංශය’ නමින් අපේ ඉතිහාසය කවි 2500කින් ලියා සම්මානයක් ද දිනා ගත්තේ ය. ‘ගමායනය’ නම් පැදි ගතෙහි පැදි 5302 කි.

මිනිසා ප‍්‍රථම ජනාවාසය තනන ග‍්‍රහයා දැන් හොඳින් පෙනෙන මානකය! රාති‍්‍ර අහසේ රතු පැහැයෙන් දිස්වේ!

තාරකාලෝලීන්ටත්, තරකා විද්‍යාඥයන්ටත් ඇස පිනවන දසුනක් මේ දවස්වල රාති‍්‍ර අහසේ දිස් වෙනවා. ඒ තමා අඟහරු ග‍්‍රහයා පැහැදිලිව හා දීප්තිමත්ව දැක ගන්නට හැකි වීම. වසර 2කට පසු රතු ග‍්‍රහයා අපට වඩාත් සමීප වූයේ පසුගිය ඉරිදායි. එහි රතු පැහැය පියවි ඇසෙනුත් දැක බලා ගත හැකියි.

 
සූර්යයාත් පොළොවත් අඟහරුත් එක එල්ලයක පිහිටන අයුරු සිත්තරකුගේ ඇසින් (නියම අනුපාතයට නොවේ)

Wednesday, March 07, 2012

හෙළ බසින් දස්කම් විස්කම් පෑ රැපියෙල් තෙන්නකෝන්

මුනිදාස කුමාරතුංග සූරීන් සමග සිටි තවත් යුග පුරුෂයෙක් ගැන කියන්නයි, මේ සටහන ලියන්නේ. කුමරතුඟු ඇසුරේ සිටි අය අතුරින් හෙළ බස නිර්මාණශීලී අයුරින් හැසිරවූ සුවිශේෂම ලේඛකයා ලෙස ඔහු හඳුන්වන්න පුළුවන්. ඔහු තමා රැපියෙල් තෙන්නකෝන් කිවිසුරාණන්.

එතුමා පැදියට පමණක් නොව ගැදියටත් එක සේ දක්ෂයකු විය. ‘සක් පුබුදුව’, ‘වවුලූව’, ‘පඬුර’ එතුමාගේ පැදි පබඳ අතරින් කැපී පෙනෙයි. ‘බස් පාර’, ‘හෙළ බස් හුරුව’ ඔහුගේ ගී‍්‍රක, ලතින්, පාලි, සංස්කෘත, ජර්මන් ආදී බසෙහි සුරුවකු වූ ‘මහා වංශය’ පැදියෙන් ලියා සම්මානයක් ද දිනුවේය. 1890 දී උපන් මෙතුමා 1965 මාර්තු 8 වැනිදා මිය ගියේ ගම්පහ පැරකුම් දෙණියේ දී මිය ගියේය.

වේලි බිඳිමින් නැවත උපන් ගංගාව : කිසි දිනෙක නොදුටු දසුනක් මවමින් ජලාශය හිස් කරන අයුරු!

2011 ඔක්තෝබර් මස අගදී වසර 100ක් පමණ පැරණි කොන්ඩිට් වේල්ල (Condit Dam) ඉවත් කරමින් අමෙරිකානු ප්‍රාන්ත රාජ්‍යයක් වන වොෂින්ටනය විසින් ධවල සැමන් ගංගාව (White Salmon River) නැවත ගලායාමට සලස්සුවා.

Tuesday, March 06, 2012

වඳ වී ගිය විශාලතම කෘමියා මුහුද මැද සීගිරියටත් වඩා උස පර්වතයක් මුදුනෙන් හමුවෙයි!

කොහොමද ඒ සතා එතැනට ගියේ ? මුහුද මැද කුලූනක් සේ උස්ව සිටින සේ පර්වත ශිඛරය අපේ සීගිරියටත් වඩා ගොඩක් උසයි. අපේ සීගිරියේ උස අඩි 1,214යි. මේ ශිඛරය අඩි 1,844ක් උසයි. අපේ සීගිරිය මුදුනේ මාලිගාවක් හදල තිබුණට මේ වගේ උලක් බඳු මුදුනක් තියෙන තැනක වාසයට සුදුසු නිවහනක් කර ගන්න බැහැ.

ඒ වුනාට ඒක බාධාවක් නෙවෙයි, මීට වසර 80කට විතර ඉස්සර වඳවී ගියේ යැයි සිතන සතෙකුට. ඒ සතාගේ අවසාන ජනපදය අඩි 1,844ක් උස බෝල්ගේ පිරමීඩය මුදුනෙ තිබුණ බව විතරයි කවුරුත් දැන ගෙන හිටියෙ.

විද්‍යාඥයන් ළඟදී සොයා ගත්තා, දකුණු පැසිපික් සාගරයේ මුහුදෙන් උඩට මතුවුණු මේ උස පර්වත ශිඛරය මුදුනේ පිහිටි ගහක ජීවත්වුණු සතුන් 24 දෙනෙක්.

 
ලෝඞ් හෝවේ දූව අසල පිහිටි බෝල්ගේ පිරමීඩය: ගස් පොකිරිස්සන් ඔවුන්ට හමු වුණේ මෙහි මුදුනේ ගලකට ඇලී සිටියදියි.

නික් කාලයිල් මේ සිටින්නේ බෝල්ස් පිරමීඩය මුදුනේ සිට හමුවූ ‘ගස් පොකිරිස්සන්’ දෙදෙනකු සමඟයි.

Monday, March 05, 2012

බි‍්‍රතාන්‍ය විද්‍යාඥයන්ගෙන් අමරණීය වෙන්න ක‍්‍රමයක්! පැතලි පණුවන් එක්ක පර්යේෂණ!

නොමැරී සදාකල් ජීවත්වෙන්න ක‍්‍රමයක් දැන් පෑදෙන ලකුණු පහළ වෙමින් තියෙනවා. වයසට යන එක, මුහුණ රැලි වැටෙන එක, නවත්තන්න මිල අධික ආලේපන ගැල්වීම හෝ අමෘතය වැනි තිරිහන් වෙන බීම පාවිච්චිය අත් හරින්න. ළඟදීම ඒකට අවස්ථාව ඒවි.

බි‍්‍රතාන්‍ය විද්‍යාඥයන් හිතන විදියට අමරණීය වීමේ රහස සොයා ගන්නට ඔවුන්ට පොටක් පෑදිලා තියෙනවා. ඔවුන් සිතන්නේ අමරණීය වීමේ රහස සැඟවිලා තියෙන්නෙ පැතලි පණුවන් (flatworms) තුළ බවයි. මේ ඉතා කුඩා ප‍්‍රාණීන් විශේෂය ජීවත්වෙන්නේ විල්, වැව්, පොකුණු ආදියේයි. මුළු සිරුර ම අලූත්වැඩියා කර ගනිමින් ඉතා සාර්ථකව සදාකල් ම ඔවුන් ජීවත්වෙන බව දැන් සොයා ගෙන තියෙනවා.

Sunday, March 04, 2012

අහසේ නම ලියා ලෝ පතල වුණු කවුරුද ? මේ කවුරු ඉකෙයා (Kaoru Ikeya)

මාසයකට ඩොලර් 35ක පඩියකට ඔහු පියානෝ තනන සමාගමක රැකියාවට ගියේය. එහි වූ ඔහුගේ පෞද්ගලික වාර්තා පතෙහි සඳහන් වූයේ ඔහු ‘දැඩි අරමුණු නැති, ඉහළට යාමේ ආශාවන් ගෙන් ප‍්‍රහීණ’ අයකු ලෙසය. ඒත් කවුරු ඉකෙයාට දවසේ රැකියාව නිම වීමෙන් පසු ඉහළට යාමේ ආශාවන්ගෙන් පිරුණු දැඩි අරමුණක් තිබුණේය. මේ අරමුණ ඔහු කෙතරම් හොඳින් සඵල කර ගත්තේ ද යත් එතෙක් සිය පවුල ලබා තිබූ අවමානයෙන් ගලවා ගෙන සස ජාතකයෙහි එන පරිදි සක් දෙවිඳු සා රුව සඳෙහි ඇන්දාක් සේ සිය පවුලේ නාමය අහසේ ලියන්නට සමත් විය. මේ දිරිය වඩන කතාව දිරිය බිඳින සාධක මැද්දෙන් සාර්ථක ගමනක් ගිය ජපන් හපන් පුතකු ගැනයි.

Saturday, March 03, 2012

රළ පදින්නෙකු විසින් පැදවූ විශාලම රැල්ල! ලෝක වර්තාවක්!

ලෝක වර්තාවක් බිද හෙළමින් රළ පදින්නෙකු විසින් පැදවූ ලොව මෙතෙක් වර්තා ගත වී ඇති විශාලම රැල්ල මෙය වේ.

ඩයිනසෝරයන්ගේ පිහාටු වර්ණය නිශ්චය කෙරේ!


විද්‍යාඥයන් පිරිසක් විසින් සිදු කල පර්යෙෂණයක් මගින් පොසිලිකරණය වු "Archaeopteryx" ඩයිනසෝර විශේෂයේ පිහාටුවේ වර්ණය නිශ්චය කෙරුනා.

Friday, March 02, 2012

අද ශී‍්‍ර ලංකාවේ සිංහල භාෂා දිනයයි. භාෂා ලෝකයේ යුග පුරුෂයෙක් සිහි කරමු.

අද මාර්තු 2 වැනිදා ශී‍්‍ර ලංකාවට සුවිශේෂ වූ දිනයක්. 1815 දී ශී‍්‍ර ලංකාව බි‍්‍රතාන්‍යයේ යටත් විජිතයක් බවට පත් වූ උඩරට ගිවිසුම අත්සන් කළේ අද වැනි දවසකයි.


ඒ වගේම ශී‍්‍ර ලංකාවේ සිංහල භාෂා දිනයත් යෙදෙන්නේ අදටයි. ඒ නිසාම අපේ භාෂාව වාර්තමානයේ පවතින තත්වයට ගේන්නට මඟ පෑදූ යුග පුරුෂයෙක් ගැන කතා කරන්න හිතුනා. ඔහු තමා මීට අවුරුදු 68කට පෙර 1944 අද වැනි දිනක අපෙන් වියෝ වූ මුනිදාස කුමාරතුංග මහතා. ඔහුගේ නිර්මාණ ගැන කලින් අප කතා කළා මතක ඇති. ළමයින්ට කතා කවි ලියන්නට ඔහු දැක්වූ දක්ෂතාව අදත් අගය කළ යුතු මට්ටමක තියෙනවා. ඒ හා සම කරන්නට තරම් නිර්මාණ අදත් හමුවෙන්නේ නෑ. හාවාගේ වග එවැනි එක් නිර්මාණයක්. (හා හා හරි හාවා - හාවාගේ වග බලන්න.)

ඇදහිය නොහැකි තරම් ශක්තිමත්! අවු.7ක් සහ 5ක් වයසැති රුමේනියානු සහොදරයින්!

මේ පුංචි යෝධයන් දෙදෙනා ඉන්නේ රුමේනියාවේ. ගියුලියානෝ (Giuliano Stroe) ස්ට්‍රෝ හත් හැවිරිදියි. ක්ලෝඩි ස්ට්‍රෝට (Claudi Stroe) තාම අවුරුදු 5යි.

Thursday, March 01, 2012

අභ්‍යවකාශයෙන් ආ බැක්ටීරියාවක් බි‍්‍රතාන්‍යයේ ගංගාවකින් හමු වෙයි! අනාගතයේ බලශක්ති ප‍්‍රභවයක් ලෙස යොදා ගත හැකියි!

සාමාන්‍යයෙන් පෘථිවියේ ඉහළ කක්ෂයක හමුවන්නේ යැයි සැලකෙන බැසිලස් ස්ට‍්‍රැටොස්ෆෙරිකස් නම් අලූත් බැක්ටීරියාවක් විද්‍යාඥයන් විසින් සොයා ගෙන තියෙනවා. විද්‍යාඥයන් කියන්නේ මෙමගින් වෙනත් ඒවාට වඩා දෙගුණයක් විදුලි බලය නිපදවිය හැකි බවයි.

ඊසානදිග එංගලන්තයේ පිහිටි සුන්ඩර්ලන්තයේ වෙයා ගංගාවේ මෝය කටේ තිබී හමු වී ඇති මෙම අබිරහස් ජීවියාට අණුජීවී ඉන්ධන ෙසෙල නම් විශේෂ බැටරියක් යොදා ගෙන විදුලි බලය නිපදවිය හැකියි.

බැසිලස් ස්ට‍්‍රැටොස්ෆරිකස් නම් මේ ක්ෂුද්‍රජීවියා හමුවන්නේ පෘථිවි තලයෙන් සැතැපුම් 20ක් පමණ ඉහළ අහසෙදියි.

 
සාමාන්‍ය බැක්ටීරියාවල වඩා දෙගුණයක් විදුලිය නිපදවන්නට මේ බැසිලස් ස්ට‍්‍රැටොස්ෆරිකස් අණුජීවියාට පුළුවන්